DILI, (TATOLI) - Diretór Jerál
Finansas Estadu Ministériu Finansa (MF), Januário da Gama, hatete MF aprezenta
ona senáriu prinsipál tolu ba Orsamentu Jerál Estadu (OJE) 2019 no ida ne’ebé
sustentavel liu mak senáriu ki’ik iha billaun $1.1, médiu billaun $1.218 no
senáriu aas liu maka billaun $1.350, maibé seidauk iha desizaun tanba tenke
haree ba prioridade sira iha tinan oin.
“Tetu sira ne’e ho senáriu tolu
ne’ebé Ministériu Finansas aprezenta sei kontinua nafatin aprezenta ba iha
konsellu ministru iha semana ida ne’e para depois halo apresiasaun no tetu
politika ida hodi bele utiliza hanesan plafon ofisiál ba orsamentu jerál 2019
nian”, Januário afirma iha konferénsia imprensa hafoin sesaun jornada
orsamentál remata iha Aitarak-Laran, ohin.
Diretór Jerál ne’e hatutan tempu
ba preparasaun OJE 2019 nian tuir lei orsamentu no jestaun finanseira hatete
iha 15 outubru 2018 tenke halo ona submisaun, maibé ho sirkuntánsia ne’ebé iha
MF sei halo ezersísiu ida hodi halo projesaun ida.
“Será ke tempu ne’ebé iha
sufisiente atu aprezenta. Husi faze preparasaun to’o finál, ami presiza pelu menus
loron 69 para bele konklui preparasaun orsamentu”, katak.
Nune’e iha loraik ne’e MF sei
halo análiza kle’an ida ba tetu ne’ebé aprezenta no halo distribuisaun ba
ministériu no instituisaun sira depois aprezenta iha konsellu ministru.
“Iha semana ida ne’e ha’u fiar
katak entre kinta ka sesta ida bele halo ona aprezentasaun ba konsellu
ministru”.
Sekretáriu Estadu
Komunikasaun Sosiál (SEKOMS), Merício Juvenal dos Reis “Akara”, hatete sobre
aprezentasaun OJE 2019 iha PN sei halo tuir posesu normál no importante maka
labele liu tempu ne’ebé fó.
“Másimu ne’e iha dia 15 de
outubru, ne’ebé regra mak durante ne’e la’o ita kumpri hanesan
Primeiru-Ministru ko’alia ita esforsu atu kumpri regra”.
Jornalista: Maria Auxiliadora | Editór:
Manuel Pinto
Imajem: Sekretáriu Estadu
Komunikasaun Sosiál, Mericio Juvenal dos Reis Akara (klaran), akompaña hosi
Diretór Jerál Finansa Estadu Ministériu Finansa (MF), Januario da Gama, (liman
loos) no Koordenadora Unidade Planeamentu Monitorizasaun no Avaliasaun (UPMA),
Brígida Soares, ko’alia ba jornalista sira iha konferénsia imprensa kona-ba
panorama orsamentál 2019 iha MF Aitarak Laran. Imajen Egas Cristovão
Sem comentários:
Enviar um comentário