quarta-feira, 19 de setembro de 2018

Governu timoroan define kombate kiak hanesan prioridade OJE nian ba tinan 2019


Xefe governu timoroan, Taur Matan Ruak, define iha loron-tersa ne'e hanesan objetivu orsamentu nasaun nian kombate kiak liu hosi diversifikasaun ekonomika.

Iha nota ida ne'ebé haruka iha loron-tersa ne'e, Taur Matan Ruak hatete katak objetivu prinsipal sira planu nian ba mandatu Governu nian iha tinan lima tuirmai maka hamenus pobreza ba 10%, kria rihun 60 postu ba serbisu no "diversifika ekonomia", ne'ebé maka kontinua depende ba petroleo.

Governu timoroan konklui iha loron-tersa ne'e debate inisial ba preparasaun Orsamentu Jeral Estadu nian ba tinan 2019, defini limite fiskal ne'ebé varia entre dolares rihun millaun 1,1 no 1,35, refere ezekutivu ne'e.

Loron hira tuirmai, Konsellu Ministru, sei analiza senariu propostu tolu - ida rihun millaun 1,1, seluk rihun millaun 1,22 resin no datoluk rihun millaun 1,35 - antez fiksa limiti masimu ba gastu sira ba tinan oin.

Debate gastu sira nian no aumentu ba reseita sira laos petrolifera sira, inkluin mós liu hosi reforma fiskal, sai hanesan prioridade sira seluk.

Sara Lobo Brites, ministra Finansas em ezersisiu, hatete katak konta sira ba tinan 2019 "asenta iha prinsipal prinsipiu lima", liuliu "sustentabilidade fiskal, foku iha prioridade nasional sira, rasionalizasaun gastu sira, kapasidade ezekusaun nian no kapasidade ekonomika hodi absorve orsamentu".

"Jornada Orsamental sira", tradisionalmente, hanesan debate naruk dahuluk iha ezekutivu no ho responsavel sira seluk administrasaun nian, institutus no orgaun publiku sira, iha preparasaun konta anual sira Estadu nia.

Debate ne'e halao kuandu Estadu ne'e moris dezde loron 01 Janeiru iha duodesimu no Prezidente Republika analiza hela OJE ba tinan ne'e, ne'ebé maka haruka ba nia iha loron 10 Setembru.

Iha loron tolu dahuluk debate nian konaba konta sira tinan 2019 nian, sorumutu ne'e konta deit ho prezensa membru sira Governu nian no iha loron-segunda no loron-tersa ne'e alarga ba seminariu publiku ida.

Entre partisipante sira semana ne'e konta ho prezidente no komisariu Komisaun Funsaun Publika nian (CFP), reprezentante Banku Sentral nian, kordenadora Komisaun Reforma Fiskal nian, diretor jeral no nasional sira, reprezentante Ajénsia Publika Autonomas sira, reprezentante Autoridade munisipiu 12 sira no Autoridade Rejiaun Administrativa Espesial Oecusse-Ambeno no reprezentante sosiedade sivil.

Iha enkontru ne'e debate konabá aspetu sira hanesan Prioridade Nasional sira ba OJE, metodu no medida sira hodi implementa, "ho forma kordenada no adekuada" Planu Estratéjiku Dezenvolvimentu nian ba tinan 2011-2030, Objetivu sira Dezenvolvimentu Sustentavel nian, Programa VIII Governu Konstitusional no Planu Asaun Anual sira.

Iha loron rua ikus "Jornada Orsamental" nian ne'e debate konabá kestaun sira hanesan sistema planeamentu no jestaun finansa publika sira iha ámbitu ba definisaun prioridade nasional sira no ho baze iha "prinsipiu sustentabilidade fiskal, rasionalizasaun ba gastu sira no utilizasaun ba rekursu sira finansas publika ho kualidade".

"Hodi determina prioridade nasional sira no limite orsamental, ho forma rasional, efikaz no sustentavel, diskusaun ne'e aborda materia sira hanesan planeamentu no orsamentu, avaliasaun dezempeñu sosioekonomiku ho analiza ba dezempeñu iha despeza atual sira, reforma ekonomika no fiskal, no dezempeñu investimentu fundu petroliferu nian" esplika Governu ne'e.

Ministeriu Finansas nian antesipa katak preparasaun b aproposta OJE nian demora entre 60 no 70 antes aprezenta ba Parlamentu Nasional.

SAPO TL ho Lusa

Sem comentários: