TL Presiza Atinje Milliaun 450 Molok 2020

DILI, (TATOLI) – Kordenadora Reforma Fiskál, Fernanda Borges, hatete Timor-Leste (TL) presiza atinje milliaun $450 molok 2020, maibé atu hetan ida ne’e la’ós ukun-na’in sira de’it mas  timoroan hotu.

“Ba timoroan hotu atubele asegura katak ita iha osan uitoan kobre ita-nia reseita, ita-nia kustu operasionál hanesan ita-nia saláriu, ita-nia pensaun presiza kobre milliaun 450, ne’e target ida ba timoroan hotu-hotu, la’ós ba Governu, la’ós de’it ba ukun-na’in sira”, Fernanda katak hafoin aprezenta prioridade Reforma Fiskál nian iha ámbitu jornada orsamentál iha Aitarak-Laran, tersa ne’e.

Nia hatutan: “Ema serbisu administrasaun, ita hotu hakarak atinje ida ne’e, ita hotu dudu hamutuk, ita sei konsege, nune’e ita ladepende ba ita-nia Mina-rai”.

Atu atinje alvu ne’e, Reforma Fiskál tau iha prioridade sira maka presiza sosa sistema ba Autoridade Tributária, aumenta sistema Asycuda World, atubele halo janela únika hodi fasilita komérsiu di’ak liután, presiza sosa pakote aplikasaun kontabilidade hanesan MYOB (Mind Your Own Business) hodi tau iha ministériu no ajénsia autónoma hotu ne’ebé koleta reseita hodi bele iha kontabilizasaun reseita di’ak liután.

“Ita presiza servisu hamutuk ho Banku Sentrál atu kria pagamentu eletróniku husi intenét ba komérsiu hodi la’o ho di’ak, selu impostu sira lalais nomós ba impostu sira ki’ikoan hanesan eletrisidade ka bee, presiza iha kartaun mobile nian”.

Aleinde ne’e presiza halo reabilitasaun uitoan ba Alfándega nia fatin serbisu no hadi’a uma iha Portu Dili para serbisu integradu la’o, kria fatin ne’ebé koleta reseita, fó atendimentu públiku di’ak ho progresivamente.

“Ita presiza harii edifísiu ba Alfándega no Tributária hodi sira bele fó prestasaun servisu ho di’ak, presiza tau matan ba infraestrutura sira seluk, portu, aeroportu Dili nian JICA mak sei tulun ita, Reforma Fiskál ajuda atubele halo planu para iha Alfándega nia área ne’ebé ema tama mai prosesa sasán iha aeroportu laran, ami ajuda ona”.

Tanba ne’e atubele to’o iha alvu ne’e maka presiza halo lei foun, hadi’a lei, introdús IVA (impostu sobre valór akresentadu), hola sistema foun, rekruta ema foun ba kada autoridade aduaneira 250 no tributária 250, maibé progresivu, tanba tenke forma sira no buat barak mak reforma halo ona, maibé tenke dudu maka’as liu para la’o no konkretiza osan tenke tama kofre.

Hafoin aprezentasaun sobre prioridade ne’ebé Reforma Fiskál hato’o, Primeiru-Ministru, Taur Matan Ruak, husu Ministra Finansas en ezersísiu atu tenta osan lalais ba ida ne’e bainhira rona baze legál ne’ebé aprezenta.

Jonalista: Maria Auxiliadora | Editora: Rita Almeida

Imajen: Kordenadora Reforma Fiskál, Fernanda Borges. Imajen Egas Cristovao.