TL-Australia superviziona kooperasaun bilateral

Governu Timor-Leste liu husi Ministériu Negosiu Estranjeiru no Kooperasaun ho Governu Australia, hala’o enkontru bileteral hodi diskuti no superviziona kooperasaun bilateral ne’ebé mak hala’o tiha ona.

Reprezentante Ministériu Negosiu Estranjeiru no Kooperasaun (MNEK) Diretor Jeral MNEK, Isílio Coelho, husi Governu Australia Primeiru Asistente Sekretáriu Prinsipal Divizaun ba Sudeste Aziátiku Departamentu Negósiu Estranjeiru no Komérsiu Australia Julie Hecker,  inklui embaixador Australia ba Timor Leste, Peter Robert.

Tanba, durante ne’e kooperasaun nasaun rua ne’e, infrenta difikulidade iha liña kordenasaun, iha nivel bilateral, rejional no multireteral, ne’ebé prejudika kooperasaun ne’ebé mak antes ne’e la’o tiha ona.

Nune’e liu husi enkontru nasaun rua ne’e, kompromete atu hametin liu tan kooperasaun ne’e iha área apoiu finanaseiru, edukasaun, saúde, infraestrutura no globalmente apoiu ba iha setór hotu-hotu.

“Enkontru ne’e realiza relasiona ho akordu steatmentu ne’ebé lansa iha 31 jullu liu ba, kuandu Ministra Negosiu Estranjeiru Julia Bishop mai viszita ofisial iha ne’e hodi konkorda ho ita nia Governu liu husi ministru negosu estranjeiru Dionisio Babo para kria meknismu ida para bele hodi diskuti, superviziona, monitoriza, avalia refere ba programa no kooperasaun ne’ebé ita ho Australia”, hateten, Diretor Jeral MNEK, Isílio Coelho ba Jornalista sira iha MNEK-Praia dos Coqueiros,Díli, Tersa (16/10/2018).

Diretor Jeral MNEK hatutan katak, iha enkontru ne’e diskuti mos kona-ba liña koordenasaun entre nasaun rua, iha dezafiu ne’ebé MNEK hasoru entre Nasaun seluk nomos liña kooperasaun ho ministerial sira, entaun presiza atu hadia iha futuru.

Nune’e mos, Embaixador Australia ba Timor-Leste, Peter Robert,  hateten, Governu Australia kontinua ho komitmentu apoiu no ajuda Timor-Leste iha aspetu hotu.

“Komitmentu Australia ajuda ba Timor-Leste kontinua nafatin, ne’ebé iha fulan kotuk ha’u entrega ona karta ofisial ba primieiru ministru foun Australia nian, hato’o komitmentu Australia nian nafatin hametin, haburas kooperasaun iha oi-oin iha Timor Leste”, haktuir, Peter Robert.

Entertantu, tuir planu enkontru bilateral ne’e sei kotinua hala’o kada tinan dala ida iha Ministériu Negosiu Estranjeiru no Kooperasaun Timor-Leste.Eus

GMN TV | Grupo Média Nacional