Portál Transparénsia Foin Opera Loloos

DILI, (TATOLI) - Portál Transparénsia Ministériu Finansas komesa tama iha operasaun loloos ne’e iha 19 novembru tanba bainhira Orsamentu Jerál Estadu 2018 aprova MF atualiza dadus orsamentu 2018 iha sistema ne’ebé maka ministériu hotu uza depois maka halo ajustamentu ba iha transparénsia portál, nune’e tempu naruk portál ne’e laiha operasaun.

“Mas dezde 19 novembru komesa ona hahú nia operasaun”, Ministra Finansas en ezersísiu, Sara Lobo Brites, afirma iha Parlamentu Nasionál ohin.

Bainhira iha audiénsia ho komisaun C, deputada husi bankada FRETILIN, Maria Angélica Rangel, kestiona kona-ba portál transparénsia tanba antes ne’e lala’o ho normál, nune’e difikulta sira atu ezerse funsaun hanesan órgaun fiskalizadór.

“Ami atu ezerse ami-nia funsaun hanesan órgaun fiskalizadór ne’e liuhusi portál ne’e de’it. Ami lalika bá haree kraik ida, tanba liuliu ami iha komisaun C (Finansas Públikas) ne’e, ami lakohi haree liubá kestaun obra sira iha kraik tanba ha’u mós la’ós enjeñeira, ha’u hakarak haree liu en termu ezekusaun oinsá”, katak nia iha plenária ohin.

Deputada ne’e levanta sobre portál tanba Komisaun C haree liubá ezekusaun orsamentu, maibé depois PN arova tiha orsamentu no promulga husi Prezidente Repúblika, hafoin semana ka fulan ida Governu bele implementa ona orsamentu ne’e, maibé realidade portál ne’e dalaruma asesu ladi’ak.

“Ami lahatene tanba kestaun saida, maibé dalaruma ita tama haree katak nia ezekusaun lala’o, entaun ami tenta husu Ministériu Finansas, maibé sira dehan ne’e kestaun téknika entaun ami akompaña nafatin, maibé ami haree katak portál transparénsia rasik lafó informasaun ne’ebé update loroloron, maibé sempre iha  semana ida, rua tiha depois mak update iha ne’ebá signifika serbisu ne’e lala’o”.

Hatutan Portál Transparénsia ne’e atu fó transparénsia orsamentál Estadu nian ba iha públiku no hanesan órgaun fiskalizadór tenke asesu nune’e bele haree no ko’alia iha plenária atu fó hanoin ba Governu tanbá sá mak nune’e no ezekusaun reál mak ida ne’e.

Hatán ba kestaun ne’e, Vise-Ministra Finansas dehan Portál Transparénsia ne’e nia dadus mai husi sistema, nia la automátikamente loroloron simu dadus, maibé iha oras balun ne’ebé maka tékniku balun tenke foti dadus husi sistema hodi tau ba iha portál.

“Entaun iha altura ida foti dadus ne’e ba tau iha Portál Transparénsia sei taka ba públiku para enserra hotu dadus depois foin loke. Bele mós iha faze ida ne’e maka halo ema barak laiha asesu, mas ami ohin ko’alia ona atu muda fali oráriu para buka fali tempu ida ne’ebé la’ós tempu ne’ebé utilizadór sira asesu mak hetan fali distúrbiu, mas funsaun la’o normál, autorizasaun ba dadus la’o loroloron para públiku bele akompaña”.

Sara esplika iha portál transparénsia ne’e iha elementu tolu mak despeza, reseita no lejislasaun no utilizadór sira sempre haree liu iha despeza tanba hakarak haree progresu ezekusaun ne’e.

Ba loron ohin, tuir portál transparénsia ezekusaun orsamentu Estadu 2018 atinje ona porsentu 72.

Jornalista: Maria Auxiliadora | Editór: Manuel Pinto

Imajen: Ministra Finansa em ezersisiu, Sara Lobo Brites. Foto António Goncalves