quinta-feira, 7 de fevereiro de 2019

SEA Husu Autoridade Lokál Labele Kolen Fó Hanoin Ba Umakain Trata Lixu

PARTILHAR

DILI, (TATOLI) – Sekretáriu Estadu Ambiente (SEA), Demétrio do Amaral de Carvalho, iha ámbitu entrega lixeira husi Pertamina Internasionál Timor SA (PITSA) ba suku Bairru-Pité husu ba xefe suku no aldeia atu labele kolen hodi fó hanoin ba umakain sira atu trata sira-nia lixu ho didi’ak.

Iha selebrasaun aniversáriu ba datoluk PITSA liuhusi asaun corporate social responsibility (CSR) ka responsabilidade sosiál korporativa oferta lixeira tolu ba suku Bairru-Pité atu kontribui di’ak ba ambiente tanba suku ne’e iha abitante hamutuk 34.999 husi aldeia 26.

“Maibé no fundo La’ós Pertamina, la’ós Governu, maibé na’i-xefe suku, aldeia, xefe família sira, ita ida-idak tane liman maka determina lixu ne’e barak, lixu ne’e lekar arbiru de’it ka la’e? Mai husi ita-nia atitude sira”, Demétrio dehan bainhira partisipa iha serimónia entrega lixeira iha sede suku ne’e, ohin.

Sekretáriu Estadu Ambiente ne’e relata nia partisipa dalatolu ona hamoos mota Maloa no semana ida de’it hamoos hotu, lixu kontinua nakonu fali ona.

Tanba ne’e, ohin loron Bairru-Pité ho nia mota no valeta símbolu lixu suku ne’e nia maka liuhusi asaun ne’e harii kompromisu foun halo asaun nivel suku ne’e atu kombate lixu hodi labele so’e lixu ba mota Maloa no valeta Hudi-Laran tanba hakarak iha futuru jerasaun sira sei bele hetan bee, ikan (bainhira lixu ba tasi) no rai ne’ebé di’ak atu kuda.

“Konta ho ita-boot sira hotu, kombate lixu xefe suku nia lideransa, xefe aldeia nia lideransa, se imi hotu lakolen atu ko’alia kona-ba lixu ne’e fó perigu ita, hotu-hotu tenke disiplina tau lixu iha nia fatin, loron ida Bairru-Pité ne’e sei moos no sai suku ida saudavel”.

Diretór PITSA, Deni Febrianto, hatete bele iha oportunidade atu partisipa hodi fó kontribuisaun uitoan kona-ba dezenvolvimentu sosiedade liuliu sétor ambiente, saúde no seguransa no ne’e parte ida husi CSR iha ne’ebé hasa’e intensidade kontribuisaun sosiedade no ba dezenvolvimentu governativa Timor-Leste. Iha tinan ne’e sei halo mós atividade CSR ne’ebé nia atividade atu hasa’e prosperiedade sosiedade.

Xefe Suku Bairru-Pité, João Baptista da Costa Belo, agradese ba PITSA tanba entrega lixu-fatin ne’e ba suku, maibé ida ne’e lato’o tanba iha suku ne’e leixeira seidauk kobre fatin hotu.

Aleinde iha aldeia 26, iha loja no kioske barak entaun fo’er sira so’e arbiru de’it, tanba ne’e presiza tan lixeira atu ema sira tau lixu iha nia fatin nune’e sidade labele fo’er.

“Kuandu husi parte boot sira mai to’o ami autoridade kraik ne’e maka ita laprepara di’ak atu tau fatin (lixu nian) atu koloka iha aldeia no abitante nia leet entaun sei fo’er nafatin”.

Lixu fatin ne’ebé PITSA entrega ne’e sei koloka iha sede suku, dalan sa’e bá Ailok-Laran no Kakau Lidun. Bainhira iha ema seluk oferese tan maka koloka ba fatin seluk ne’ebé seidauk iha.

Xefe suku ne’e dehan kona-ba dekretu lei 33/2008 sobre ijiene no orden públika nian halo ona sosializasaun dalabarak ona, maibé falta de’it implementasaun.

“Bainhira implementasaun para fó multa ba abitante sira ne’ebé so’e fo’er arbiru, lalika barak ida dólar lima, rua ka ida ne’e ita-nia abitante sira balun ta’uk ona sei la so’e fo’er arbiru”.


Jornalista: Maria Auxiliadora |Editora: Rita Almeida

Imajen: Sekretáriu Estadu Ambiente (SEA), Demétrio do Amaral de Carvalho hasai foto hamutuk hafoin entrega lixeira ba xefe suku Bairru-Pité. Foto/Mídia SEA.
PARTILHAR

Author: verified_user

Publicação luso-timorense sem fins lucrativos

0 comentários: