Estadu ‘alerta’ Reforsa Kontrola Importasaun Droga

DILI, (TATOLI) - Estadu Timor-Leste liuhusi Prezidente Repúblika, Francisco Guterres Lú Olo ho Primeiru-Ministru, Taur Matan Ruak, apresia tebes ho servisu Polisia Nasional Timor-Leste (PNTL) ne’ebé konsege deteta no kaptura autór droga ne’ebé tenta hatama droga mai Timor-Leste.

PR Lú Olo ho PM Taur Matan Ruak, halo mós ‘alerta’ ida ba entidade hotu-hotu, inklui povu Timor-Leste no juventude sira atu kolabora malu hodi kontrola importasaun droga mai Timor-Leste. Tanba, bele estraga karater no mentalidade juventude timoroan nian.

“Ida ne’e maka preokupasaun ida ne’ebé Prezidente Repúblika preokupa no ha’u rasik mós preokupa, liuliu tanba ita iha nasaun ida maka maioria ita nia sidadaun ne’e joven, entaun ita tenke kria mekanizmu ida para reforsa kontrola ne’ebé di’ak liu”, afirma  Taur Matan Ruak,  ba jornalista sira, ohin,  iha Palásiu Prezidente Nicolau Lobato,  hafoin hasoru malu ho PR Lú Olo.

Foin lalais ne’e, Polisia Servisu Investigasaun Kriminál (PSIK) ho kolaborasaun husi intelijénsia no servisu Alfándega konsege kaptura autór  timoroan ida ne’ebé mak importa droga mai Timor-Leste liuhusi aeroportu internasionál Prezidente Nicolau Lobato ho  aviaun Silk Air husi Singapura mai Dili.

PM Taur Matan Ruak hateten, kestaun maka se Timor-Leste nasaun atrazadu ka foin ukun aan iha tinan 19 nia laran, maibé bele deteta droga, tanbasá nasaun sira ne’ebé dezenvolvidu labele deteta.

“Intensionalmente, keta sira maka hakarak haruka buat sira ne’e mai iha ita-nia rai. Entaun, ne’e kestaun ida ne’ebé ita tenke atensaun no buka hatene. Tanba loloos ne’e, nasaun sira ne’ebé dezenvolvidu maka sira nia seguransa no kontrolu ne’e rigorozu liu”, afirma  Taur Matan Ruak.

PM Taur Matan Ruak, fó parabens ba instituisaun Estadu (PNTL) ne’ebé iha kbiit para bele deteta no kaptura ona autór hatama droga no apela ba sidadaun sira para labele monu ba iha tentasaun sira ne’e tanba prejudika sosiedade liuliu joven sira.

Médikamente, droga lori impaktu negativu maka hanesan muda ema nia karater bele di’ak ba at, degradasaun valór disiplina, karater emosionál ne’ebé la kontroladu, halo ema sai barukten, perigu ba ema nia saúde no fasil komete krime.

Jornalista: Xisto Freitas | Editór: Francisco Simões

Imajen: PR Francisco Guterres Lú Olo ho PM Taur Matan Ruak. Imajen/doc