sábado, 13 de abril de 2019

Prezidente Repúblika “Lakontente” ho Atuasaun Polisia Hasoru Vendedór Ambulante


DILI, (TATOLI) - Prezidente Repúblika (PR), Francisco Guterres Lú Olo, hatudu nia laran “lakontente” ho atuasaun polisia, foin lalais ne’e, hasoru vendedór  ambulante ne’ebé tenke rezulta fali inan feton ida ran fakar iha estrada laran.

Prezidente Repúblika hateten, se iha manifestasaun ne’e mak vendedór ambulante sira ou organizadora sira la obedese ba lei manifestasaun nian, maka Polisia iha devér atu atua, maibé tenke ho ninia maneira aprosimasaun.

“Ko’alia kona-ba liberdade espresaun, ami Conselho de Imprensa (CI) mós preokupa no la aseita no atuasaun polisia nian hasoru ita nia vendedór ambulante sira ne’ebé tenke fakar tan ran dala ida iha Timor ukun an ida ne’e. Tanba ne’e, ami mós hato’o ami nia preokupasaun ne’e ba Prezidente Repúblika”, hateten Prezidente CI, Virgilio da Silva Guterres, ba jornalista sira, ohin, hafoin audiénsia ho Prezidente Repúblika, iha Palásiu Prezidénsia Nicolau Lobato, Bairru Pite, Dili.

Virgilio Guterres haktuir katak, mezmu CI nia kompeténsia ladún natoon kona-ba   promove liberdade espresaun, maibé hanesan sidadaun preokupa ho atuasaun sira ne’ebé ladún nesesita atu halo.

Rona tiha preokupasaun CI nian ne’e, Virgilio Guterres lia tun dehan,  Prezidente Repúblika  mós “lakontente” tanba tuir Prezidente Repúblika nia haree katak, rekursu atuasaun ida mais valor liu iha situasaun ne’ebá tuir loloos polisia halo uluk aproximasaun hodi ko’alia didi’ak ho vendedór ambulante sira.

Virgilio hateten, Dili nudár sidade tenke moris iha ambiente moos. “Ita hakarak hamoos  fo’er husi Dili, la’ós hamoos ema husi Dili”.

Hafoin konferénsia imprensa iha Largo Lecidere, iha loron 2 fulan Abril, foin lalais ne’e, manifestante husi Movimentu Sosiál Timor-Leste hamutuk ho vendedór ambulante sira halo marsa ba pás mai to’o iha resintu Parlamentu Nasional   atu entrega petisaun ba ninia reprezentante sira iha Uma Fukun PN, maibé intensaun ida ne’e la konsege tanba polisia uza forsa hodi tiru gas lakrimojéniu obriga hapara sira nia asaun.

Intensaun husi manifestasaun no asaun dame ne’e atu espresa sira nia lamentasaun ba Rezolusaun Autoridade Munisípiu Dili kona-ba implementasaun polítika eviksaun hasoru vendedór ambulante sira. Ironia, vendedór ambulante  sira nia protestu ida ne’e  responde kedas ho aksaun brutalidade husi polisia hodi rezulta vendador na’in ida kanek iha ulun no seluk monu dezmaia tanba la aguenta ho gas lakrimojéniu.

EKIPA

Imajen: Prezidente CI, Virgilio da Silva Guterres, kaer liman ho Prezidente Repúblika (PR), Francisco Guterres Lú Olo, Sesta (12/4/2019), iha Palásiu Prezidénsia Nicolau Lobato, Bairru Pite, Dili. Imajen/CI

Sem comentários: