Austrália hatete katak sei kontra ba eventual kastigu mate iha kazu Assange nian

Austrália deklara ona iha loron-sesta ne'e katak sei kontra kastigu mate ba Julian Assange bainhira australianu, fundador hosi WikiLeaks, haruka ba Estadus Unidus, haktuir hosi ajénsia notísia AP.

Ministra Negósiu Estranjeiru australianu, Marise Payne, hatete ona katak Austrália sei kontra kastigu mate.

Marise Payne deklara mós katak Reinu Unidu buka hetan ona garantia sira iha Estadus Unidus hodi Assange labele hetan kastigu mate bainhira haruka ba nasaun ne'e.

"Prosesu estradisaun rasik hanesan kestaun ida entre Estadus Unidus ho Reinu Unidu, maibé ami simu mós informasaun ne'e hosi Reinu Unidu", Payne hatete ba jornalista sira hodi refere katak Austrália "hanesan kontra tebes kastigu mate nian".

"Ne'e hanesan pozisaun bipartidáriu ida no ami defende nafatin", deklara hosi ministra.

Marise Payne hatete mós katak funsionáriu diplomátiku sira sei vizita fundador hosi WikiLeaks iha fatin ne'ebé agora daudaun nia sai detidu, iha Londres.

Primeiru-ministru australianu, Scott Morrison, hatete ona katak planu estradisaun ruma "sei laiha ligasaun ho Austrália" no Assange sei simu de'it asisténsia padraun hosi funsionáriu konsular sira hosi Austrália nian iha Reinu Unidu.

Tuir Morrison, australianu ho tinan 47 sei hasoru konsekuénsia sira hosi violasaun ruma lei nian iha jurisdisaun estranjeiru sira.

Sinal sira apoiu nian ba Assange mosu iha loron-sesta ne'e iha Austrália, ema na'in 30 resin marxa iha sentru Sydney nian hafoin hasoru malu iha konsuladu britániku nia liur hodi husu libertasaun hosi figura ida ne'ebé sira konsidera hanesan kruzadu ida ba lia-loos no liberdade espresaun nian.

Sira hakilar, bainhira kaer kartaz sira ho mensajen sira "Assange Livre - Laiha estradisaun ba EUA", "Liberta lia-loos; Assange Livre; labele lansa iha mensajeiru". Protestu ki'ik seluk hodi apoia Assange akontese mós iha loron-sesta ne'e iha Melbourne.

Sindikatu hosi jornalista sira Austrália nian, Media Entertainment and Arts Alliance, apoia mós apelu sira hodi liberta Assange.

Prezidente sindikatu nain, Marcus Strom, hatete katak Assange hetan perseguisaun tanba "asaun sira jornalizmu nian".

Strom deklara ona katak WikiLeaks simu ona, iha 2011, honraria importante tebes hosi jornalizmu australianu, Walkley Award, no iha Assange nia kazu hanesan de'it kestaun ida hosi liberdade imprensa nian.

"Julian Assange hetan perseguisaun tanba asaun sira jornalizmu nian ne'ebé maka WikiLeaks divulga (…), fó sai informasaun sira ne'ebé hanesaun duni interese públiku nian, envolve krueldade ho posibilidade krimi sira funu nian ne'ebé halo iha Irake ho Afeganistaun", Strom hatete ba Australian Broadcasting Corp.

Strom lembra katak dokumentu sira ne'e publika ona iha jornal sira hanesan New York Times, britániku The Guardian, no iha Austrália, publika iha Sydney Morning Herald ho Melbourne Age.

"Tanba motivu sira ne'e maka sai hanesan kestaun ida liberdade imprensa nian", nia hatete hodi refere katak "la'ós hanesan kestaun pesoal kona-ba Julian Assange”.

Iha loron-sesta ne'e, Assange nia inan, Christine Assange, hakerek ona mensajen ida iha Twitter hodi husu atu polísia, prizaun ho tribunal iha hahalok di'ak ho nia oan-mane.

Kaer ona fundador hosi portal WikiLeaks iha loron-kinta iha Londres ho baze hosi akuzasaun rua: ida tanba la tuir medida sira koasaun nain ne'ebé halo hela mandadu detensaun nian iha tinan 2012 hosi tribunal ida iha Londres no ida seluk tanba pedidu ida estradisaun nian hosi Estadus Unidus, ne'ebé akuza nia ba "pirataria informátiku" ho konspirasaun.

Julian Assange, moris iha tinan 47 liubá iha Austrália, hetan kaer iha loron-kinta iha embaixada Ekuador nia laran iha kapital britániku - ne'ebé hanesan nia hela fatin durante tinan hitu resin -, hafoin Quito hasai tiha direitu azilu nian.

Juíz britániku ida rona ona Assange no konsidera fundador WikiLeaks nian hanesan kulpadu tanba viola termu sira hosi nia liberdade kondisional, akuzasaun ida ne'ebé bele hamosu kastigu ida ba kadeia durante fulan 12 iha Reinu Unidu.

Akuzasaun norte-amerikanu sira kona-ba publikasaun hosi dokumentu governamental sekretu sira hamutuk millaun resin bele hamosu funu judisial ida hodi tenta haruka nia ba Estadus Unidus.

Lusa | iha SAPO TL