Timor-Leste hato'o ba EUA arendamentu durante tinan 100 ba rai hosi embaixada nian iha Díli

Governu timoroan hato'o proposta ba Estadus Unidus ba arendamentu ida durante períudu tinan 100 ba rai sira ne'ebé agora daudaun situa embaixada norte-amerikanu nian iha Díli, hatete hosi ministru Justisa ba Lusa.

"Konsellu Ministru sira aprova ona proposta ida hosi memorandu entendimentu ho rekizitu sira hotu hodi haree fali ka halo suplementu ida ba kontratu arendamentu ne'ebé iha ona", hatete hosi Manuel Cáceres da Costa bainhira halo deklarasaun sira ba Lusa iha Díli.

Memorandu ne'e hakarak rezolve difikuldade ne'ebé maka dura ona tinan barak nia laran no iha ligasaun ho vontade hosi Governu norte-amerikanu hodi aumenta períudu arendamentu ba fatin, hodi bele hala'o obra sira iha edifísiu sira ne'ebé iha ona.

Iha fulan-Marsu, ministru Negósiu Estranjeiru timoroan hatete ona ba Lusa katak Misaun Permanente Timor-Leste nian iha ONU taka temporariamente tanba atrazu sira iha entendimentu ho Estadus Unidus kona-ba arendamentu hosi rai sira hosi nia misaun iha Díli.

Manuel Cáceres da Costa hatete ona katak kontratu atual hala'o to'o tinan 2032, ho renovasaun automátiku ida to'o tinan 2052, no Estadus Unidus husu ona aumentu ida hosi prazu ne'ebé naruk liu.

"Emabixada hakarak halo monu xanxelaria atual hodi harii xanxelaria foun ne'ebé ho fatin barak, tanba sira hatete katak (...) ida atual ne'e la serve", nia hatete.

"Sira halo ona proposta ida iha tinan haat liubá bainhira ha'u la hanoin atu sai nu'udar ministru. No ami foin hahú de'it negosiasaun sira ne'ebé maka'as hahú hosi fulan-Janeiru tinan ne'e", nia hatutan.

Ministru Justisa hatete ona katak lei defini katak embaixada sira bele halo kontratu arendamentu nian ba tinan 50" no, bainhira desizaun favorável hosi ministru responsável, ministru Justisa bele autoriza aumentu ida to'o tinan 99".

"Iha kazu ne'e no hafoin simu relatóriu favorável ida hosi MNE, ha'u desidi aprova kontratu durante tinan 50 no aumenta tinan 50. Total ida hamutuk tinan 100, ne'ebé hahú hosi loron asina aditamentu ba kontratu ida ne'ebé iha ona", nia esplika.

Lusa | iha SAPO TL