terça-feira, 2 de abril de 2019

Sesta Ne’e, Governu Selu ConocoPhillips ho Shell


DILI, (TATOLI) - Governu Timor Leste, Sesta mai ne’e (5/4/2019), sei halo pagamentu ho montante millaun US$650 ba kompañia ConocoPhillips ho Shell.

Governu  deside sosa asaun husi kompañia rua ne’e hodi sai mós na’in ba prosesu esplorasaun poténsia mina no gas iha kampu Greater sunrise (GSR).

Vise Ministra Finansa, Sara  Lobo Brites, ohin, informa katak, tuir loloos governu halo ona pagamentu, maibé husi parte kompañia mak  husu adia tanba sei prienxe rekizitu balun molok hetan pagamentu husi Timor-Leste.

“Sira iha tan rekizitu ida tenke prienxe molok ita transfere, tanba ne’e, sira husu ita adia ba dia 5 de Abril”, hateten Ministra Finansa ein ezersísiu ne’e  ba Jornalista sira hafoin hasoru malu ho Primeiru Ministru (PM),  Taur Matan Ruak, iha Palásiu Governu.

Nia garante katak, Timor-Leste sei la selu multa, tanba la’ós Governu Timor-Leste maka tarde iha prosesu transferénsia, maibé parte ConocoPhillips ho Shell mak husu adia pagamentu .

“Ita prontu ona atu selu kedas iha loron 18 fulan Marsu, foin lalais ne’e. tanba ne’e, ita sei la multa”, afirma Sara Brites Lobo.

Jornalista: Agapito dos Santos | Editór: Francisco Simões

Imajen: Ministra Finansa ein ezersísiu, Sara Lobo Brites. Imajen/Egas Cristovão

Sem comentários: