Tribunál Aplika Prizaun Preventiva ba Arguidu Rua Oho Tan Lin Xue

DILI: Tribunál Munisipál Dili (TMD) deside fó pena prizaun Preventiva ba arguidu LJ no arguidu AF ne’ebé sai autór ba oho sidadaun Xineza Tan Lin Xue iha Segunda (25/3) madrugada, iha Aldeia Frecat, Suku Bairru-Pité, Postu Administrativu Don Aleixo, Dili.

Iha Primeiru Interrogatóriu Tribunál aplika kedan medida koasaun prizaun preventiva ba arguidu LJ no AF tanba arguidu na’in rua halo duni krime omesidu agravadu hodi hamate ema no ba arguidu JF tribunál aplika Termu Identidade Rezidénsia (TIR) tanba laiha indisiu forte.

Juis Titulár Zulmira Auxiliadora, hateten desizaun tribunál nian hodi aplika medida koasaun prizaun preventiva ba arguidu LJ no AF ne’e atu hein prosesu investigasaun ne’ebé sei hala’o husi ministériu públiku.

Maibé, TMD rasik haree katak kazu ne’e prenxe duni kriteria katak arguidu nain rua komete duni krime omesidu ne’e.

Iha fatin hanesan, Defensór Públiku Agostinha de Oliveira konsidera medida koasaun prizaun preventiva ba nia kliente sira adekuadu tanba arguidu sira konfesa katak sira komete duni krime omesidu ne’e.

“Iha primeira interrogatóriu ne’e arguidu sira konfesa duni faktu sira katak sira mak oho duni vítima (Tan Lin Xue) iha Bairru Pité-Dili,” dehan nia iha tribunál Munisipál Dili, Sábadu (30/01).

Nia dehan, desizaun tribunál nian la’ós remata iha ne’e, maibé sei hein prosesu investigasaun husi MP.

Iha Primeiru interrogatóriu Ministériu Públiku promove arguidu sira ba krime omesidu agravadu ne’ebé previstu iha artigu 139 husi kódigu penál Timor-Leste nian.

Tuir kronolojia ne’ebé MP Aprezenta ba Tribunál, Xineza Tan Lin Xue ne’ebé hetan oho husi arguidu na’in rua ne’e iha Segunda (25/3) madrugada, iha Aldeia Frecat, Suku Bairru-Pité, Postu Administrasaun Don Aleixo, Dili.

Audensia julgamentu ne’e prezide husi juis titulár Zulmira Auxiliadora,ministériu públiku reprezenta husi prokuradór Pedro Baptista, arguidu sira hetan asisténsia legál husi defensór públiku.

Martinha Ximenes | Independente