terça-feira, 2 de abril de 2019

Marsu 2020, Hahú Konstrusaun Aeroportu Comoro

PARTILHAR

DILI, (TATOLI) - Projetu konstrusaun Aeroportu Internasionál Prezidente Nicolau Lobato, Comoro, Dili, sei hahú iha Marsu 2020.

Konstrusaun ba projetu ne’e sei finansia husi Estadu no povu Japaun ho montante orsamentu Millaun US$44, ne’ebé hahú tama ona iha diskusaun Governu Japaun nian atu toma desizaun iha fulan Abril ne’e.

“Ha’u nia governu sei halo desizaun kona-ba projetu konstrusaun Aeroportu Internasionál Prezidente Nicolau Lobato, iha Abril nia laran no ha’u nia governu hein katak Japaun no governu Timor-Leste sei halo konkordánsia iha Maiu, tinan ida ne’e”, hateten  Embaixadór Japaun mai Timor-Leste, Hiroshi Minami, ba jornalista sira, ohin, hafoin halo enkontru ho Prezidente Repúblika, Francisco Guterres Lú Olo, iha Palásiu Prezidensiál.

Embaixadór Hiroshi Minami, garante katak, konstrusaun fíziku ba aeroportu ne’e sei la afeta ba komunidade, tanba konstroi de’it aeroportu atuál ne’e no la halo alargamentu.

“Tuir ha’u nia hatene, konstrusaun ne’e la afeta ba komunidade ne’ebé hela besik aeroportu internasionál tanba konstrusaun halo de’it iha aeroportu laran”, tenik Hiroshi Minami.

Aeroportu Comoro nia konstrusaun sei han tempu tinan ida, tanba ne’e, iha tinan 2021 prosesu konstrusaun bele finaliza ona hodi entrega ba Governu Timor-Leste.

Prezidente Repúblika, Francisco Guterres Lú Olo, apresia ho programa konstrusaun aeroportu internasionál ne’e no husu governu Japaun atu kontinua halo diskusaun kle’an ho governu Timor-Leste para alkansa obra ne’e.

Jornalista: Xisto Freitas | Editór: Francisco Simões

Imajen: Aeroportu Prezidente Nicolau Lobato, Comoro, Dili. Imajen/Google.
PARTILHAR

Author: verified_user

Publicação luso-timorense sem fins lucrativos

0 comentários: