terça-feira, 2 de abril de 2019

Governu Buka Solusaun ba Kontratu Arrendamentu Otél Timor


DILI, (TATOLI) - Otél Timor ne’ebé okupa ona tinan barak hodi halo negósiu, maibé to’o oras ne’e, seidauk iha kontratu ida ho Governu atu selu arrendamentu ba kofre Estadu.

Maske nune’e, Ministru Justisa (MJ), Manuel Cárceres da Costa, halo ona komunikasaun ativu no aproximasaun ho dirijente Otél Timor  atu selu arrendamentu ba kofre Estadu.

Liuhusi enkontru ho Primeiru Ministru (PM), Taur Matan Ruak, ohin, iha Palásiu Governu, Ministru Manuel Cárceres da Costa, mós informa ba Xefe Governu kona-ba kontratu arrendamentu ho  Otél Timor nian.

“Agora daudauk, dirijente Otél Timor, Tiago Barata, koopera  di’ak tebes ho Ministériu Justisa”, informa Ministru Manuel Cárceres da Costa, ba jornalista sira, hafoin enkontru ho PM Taur Matan Ruak.

Ministru Manuel Cárceres, halo ona enkontru dala barak ho dirijente Otél Timor no sei kontinua nafatin hodi buka solusaun ba kestaun ne’e.

“Ohin, ami iha ministériu justisa lori dokumentu sira ne’e ba atu regulariza tiha situasaun Otél Timor nian”, hateten Manuel Cárceres da Costa.

Ministru Justisa ne’e la fó klarifikasaun detallu kona-ba tinan hira ona mak Otél Timor la selu arrendamentu no  tinan hira on mak Estadu oferese propriedade ne’e ba kompañia hodi halo negósiu otélaria.

Jornalista: Agapito dos Santos | Editór: Francisco Simões

Imajen: Otél Timor. Imajen/espesial

Sem comentários: