Roy Trivedy Hasoru PM Ko’alia Kestaun Má Nutrisaun

DILI, (TATOLI) – Organizasaun Nasaun Naklibur sira (ONU-sigla inglés) liuhosi ninia Koordenadór Rezidente, Roy Trivedy, ho ekipa ohin hasoru Primeiru-Ministru,  Taur Matan Ruak, hodi ko’alia kona-ba kestaun má nutrisaun no polítika ba seguransa ai-han.

“Obstákulu ne’ebé ami ko’alia ho Primeiru-Ministru maka problema má nutrisaun, tanba ita hatene ita nia populasaun barak maka enfrenta problema má nutrisaun, liuliu labarik ki’ik entaun afeta ba sira nia dezenvolvimentu fíziku”, dehan Roy Trivedy ba jornalista sira hafoin enkontru ho Xefe Governu iha Palásiu Governu.

Obstákulu ida seluk, nia dehan polítika seguransa ai-han liuliu hasae produtividade iha setór agrikultura ba produsaun ai-han ida seguru  ho nutrisaun di’ak, tanba tuir relatóriu populasaun barak seidauk asesu ai-han ho nutrisaun aas.

“Ita presiza hadi’a ida ne’e liuhosi hasae produtividade iha setór agrikultura no mós edukasaun atu hasae konsiénsia komunidade kona-ba importánsia hosi nutrisaun”, tenik tan.

Atu rezolve problema ne’e, nia fó hanoin; dalan ida maka kolaborasaun servisu entre instituisaun oi-oin hanesan iha área saúde, edukasaun, agrikultura, bee no saneamentu no seluk tan.

Roy Trivedy afirma Xefe Governu iha kompromisu sei servisu hamutuk ho parseiru internasionál sira, ONU nian iha Timor-Leste hodi investe maka’as liután iha setór produtividade.

“Ami kontente tebes, tanba Primeiru-Ministru iha kompromisu maka’as hamutuk ho ninia gabinete,  ONU sei servisu hamutuk ho governu hamutuk rezolve obstákulu ne’ebé nasaun enfrenta”, tenik tan.

Tuir relatóriu ONU, situasaun nutrisaun iha Timor-Leste rejista, porsentu 50 labarik tinan neen mai kraik simu susu ben inan durante tinan rua fulan neen, labarik má nutrisaun porsentu 46, porsentu 40 krekas 40, porsentu 40 krekas aas , sofre anemia tinan lima mai kraik porsentu 40, feto porsentu 24 hosi tinan 15-49 sofre problema anemia.

Hosi persentajen labarik tinan lima mai kraik ne’ebé hasoru problema stantin  iha kada munisípiu persentajen boot liu hosi munisipiu Ainaru ho porsentu 60, Bobonaru porsentu 53, Vikeke porsentu 52, Baukau porsentu 51, Oekusi porsentu 51, Kovalima porsentu 48, Likisá porsentu 47, Manatutu porsentu 46, Aileu  porsentu 46, Dili porsentu 42, Lautein porsentu 41, Manufahi porsentu 38 no Ermera porsentu 29.

Jornalista: Agapito dos Santos | Editora: Rita Almeida

Imajen: ONU nia Koordenadór Rezidente, Roy Trivedy. Imajen UN Iha TL