segunda-feira, 8 de abril de 2019

TDD notifika eis PPN Vicente Guterres

PARTILHAR

Prezidenti Asosiasaun Majistratura Judisial Timor-Leste (AMJTL), Antoninho Gonçalves, hateten, Tribunal Distrital Díli (TDD), liu husi juíz prosesu submete ona karta notifikasaun direta ba eis Prezidenti PN, Vicente Guterres atu marka prezensa nu’udár arguidu iha julgamentu, tanba deskonfia komete krimi abuzu de poder no partisipasaun ekonomia.

“Ema hotu hatene katak Vicente Guterres dau-daun ne’e la asumi ona kna’ar iha PN, tanba ne’e TDD iha fulan ne’e haruka ona notifikasaun diretamente ba Vicente Guterres, inklui sasin sira hodi marka prezensa iha primeiru julgamentu ne’ebé sei hala’o depois de ferias judisiáriu”, Prezidenti AMJTL ba GMN iha ninia kna’ar fatin, Caicoli-Díli, Sesta (05-04-2019.

Nia esplika, TDD la presiza notifika ba PN, maibé diak liu kopia mós despaixu TDD nian hodi hato’o de’it informasaun ba PN katak, notifikasaun ne’ebé antes ne’e TDD haruka ba PN kona-bá imunidade Vicente Guterres la vale ona, ho razaun Vicente Guterres la asumi ona kna’ar iha uma fukun PN, nune’e la presiza hasa’i imunidade.

“TDD la presiza notifika ba PN, tanba dau-daun ne’e Vicente Guterres la asumi ona kna’ar iha PN, maibé diak liu kopia de’it despaixu juíz ninian hodi hato’o de’it informasaun ba PN, atu nune’e PN bele hatene katak, notifikasaun ida uluk TDD haruka ne’e la vale ona, tanba dau-daun ne’e Vicente la asumi kna’ar hanesan deputadu, nune’e la presiza hasa’i imunidade, maibé la haruka mós la iha problema”, informa Antoninho.

Eis Prezidenti PN ne’e, deskonfia komete krimi abuzu de poder no partisipasaun ekonómia ne’ebé previstu iha artigu 297, 299 husi kódigu penal Timor-Leste relasiona ho projetu sosa kareta prado ba deputadu lejislatura da-toluk. ita

GMN TV | Grupo Média Nacional
PARTILHAR

Author: verified_user

Publicação luso-timorense sem fins lucrativos

0 comentários: