Segundu Trimestre, Ekipa “Fact-Finding” Sei Vizita Timor-Leste

DILI, 03 maio 2019 (TATOLI) - Ekipa “Fact-Finding” ASEAN (Organizasaun Nasaun Sudeste Aziátika-sigla inglés) nian se vizita Timor-Leste iha segundu-fim-trimestre tinan ne’e.

Diretór Jerál Asuntu ASEAN, Jorge Trindade Camões informa katak koordenasaun entre Ministériu Negósiu Estranjeiru no Kooperasaun (MNEK) ho Sekretáriu Jerál ASEAN nian iha Jakarta inklui Gabinete ASEAN nian iha Tailándia la’o hela no iha komunikasaun di’ak, liuliu “Fact-finding Mission” ba politikál seguransa nian.

“Inisialmente ita tenta hela atu realiza iha fulan balun maibé adia uitoan tanba konforme informasaun ne’ebé maka to’o ami-nia tilun, sei akontese iha segundu-fim-de-trimestre tinan ida ne’e,” informa Diretór Asuntu ASEAN, Jorge Trindade Camões ba TATOLI iha edifísiu MNEK, Praia dos Coqueiros, Dili, sesta (03/05).

Diretór ne’e mós hatutan: “Koordenasaun entre Timor-Leste no Chair ASEAN nune’e mós Sekretáriu Jerál ASEAN nian la’o di’ak hela atravéz  embaixada Timor-Leste iha Indonézia no iha Tailándia. Ami hein hela komunikasaun formál husi parte ASEAN katak bainhira maka sei iha fali komunikasaun kona-ba data ezata”.

Diretór Jorge Trindade Camões hateten, bainhira ekipa “Fact-finding” vizita Timor-Leste, ministériu relevante sira hanesan MNEK, Ministériu Defeza no Interiór, Ministériu Justisa (MJ) sei atualiza ba ekipa ne’e kona-ba situasaun polítika no seguransa Timor-Leste nian.

“Alende ne’e, Timor-Leste husi parte Ministériu Negósiu Estranjeiru sei prepara karta ofisiál ida ba parte ASEAN nian atu bele husu la’ós de’it ba parte seguransa nian maibé mós pilár ekonomia no sósiu-kulturál ninian hodi nune’e bele haruka sira-nia tékniku sira hodi mai tulun timoroan sira hodi bele lori prosesu adezaun ne’e ba iha ASEAN,” tenik diretór.

Ekipa “Fact-finding” ne’ebé sei vizita Timor-Leste, Diretór Jorge Trindade Camões espera katak loron ida Timor-Leste mós sei sai membru mós ba organizasaun aziátika ne’e tan konsidera katak la’ós Timor-Leste nia interese de’it atu sei membru ASEAN maibé inklui mós ASEAN rasik.

“Ha’u hanoin ASEAN rasik mós interese bo’ot atu Timór bele hola parte iha komunidade ASEAN tanba hau-nia hanoin ASEAN mós sei sente ladún di’ak kuandu Timor-Leste hela iha li’ur de’it ka la tama iha organizasaun ASEAN nia laran,” konklui diretór diretór jerál asuntu ASEAN.

Lee mós notísia: http://www.tatoli.tl/2019/04/timor-leste-hein-konsensu-asean-hodi-adere/

Jornalista: Nelia Rosário | Editór: Rafy Belo

Imajen: Diretór Jerál Asuntu ASEAN, Jorge Trindade Camões. Foto TATOLI: António Gonçalves