INGLATERRA, 3 maiu 2019 (TATOLI)
– Elisio Ximenes, timoroan, ne’ebé hela no servisu iha sidade Scunthorpe,
Inglaterra, sai notísia boot iha mídia sira iha Reinu Unidu (UK-sigla inglés)
tanba manán premiu 58.000£ iha Lotaria 49.
Hanesan hakerek Daily Mirror: “Factory
worker quits job to see family for first time in FIVE years after £58k win”. Iha
Daily Mail adianta ho títulu: ”Chicken factory worker who came to UK to
send money back to his wife in East Timor wins £58,000 on lottery – and now
he’s planning to start a restaurant in his home country”. Hosi jornál
seluk, The Sun, mós halo kobertura ba sorteadu Elisio Ximenes ho títulu boot “Chicken
factory worker scoops £58k on Betfred lottery with £2.70 bet”.
Fonte sira haktuir katak, hafoin
hetan premiu ho folin millaun poundsterline, Elisio Ximenes, rezigna an kedas
hosi nia servisu fatin, fabrika Two Sister Food iha Scunthorpe.
Nu’udar traballadór iha
Inglaterra durante tinan lima nia laran, Elisio Ximenes ho rendimentu mensal
1200£ sempre suporta osan ba nia família iha Baucau, Timor-Leste.
Elisio Ximenes nia planu iha
tempu badak, hakarak fila ona mai Timor-Leste ho hanoin, oinsa atu investe osan
ne’ebé nia “ra’ut” iha Loteria 49 iha Inglaterra. Tuir notisia iha media
lokal nian, GrimsbyLive, katak sei loke negósiu restaurante ida iha
Timor-Leste. Maibé, molok ninia regressu, Elisio booking ona ferias ho nia
família, ne’ebé nunka haree desde sai hosi Timor, ho destino Bali-Indonézia.
Ideia ida atu loke business
restaurante ne’e, tanba Elisio Ximenes nia kaben hatene te’in no te’in furak,
liuliu hahán tradisionál sira.
“Agora, nia bele sai
hanesan xefe koziñeira ida iha ninia restaurante rasik iha Timor-Leste”,
hateten Elisio Ximenes.
“Hau mai buka serviso iha
Inglaterra tinan lima ona. Tamba sirkunstansias, nunka iha oportunidade ba
Holiday iha Timor-Leste hodi “mata saudades” ho hau nia familia. Ho tulun husi
komunidade Timor oan iha Scunthorpe, hau hetan serviso ida estavel nebe
konsegue halao hau nia moris iha ne’e no hau nia familia nian iha Timor-Leste”,
tenik Elisio Ximenes ba media lokál sira iha Inglaterra.
Tinan lima nia laran, Elisio
Ximenes, koko sorte iha fatin jogu Betfred ho aposta 1 Pound semana-semana,
maibé nunka hetan sorte, to’o nia hanoin “tanbasá ha’u labele uza to’ok numeru
hau nia obra iha serviso fatin?” Numeru aposta ma’ak 26,27,46,47,49.
Hafoin hatene katak manan premiu
58.000£, nia telefone fo hatene kedas nia kaben iha Timor-Leste. “Hau telefone
nia atu dehan katak ami nia moris muda ona tanba de’it aposta 2.70£, nia la
fiar hau ida. Hau nia fe’en hatan deit: Maromak tau matan hela ba ita!”.
Dada’uk ne’e, tuir dadus katak
timoroan liu rihun 16 mak hela iha Inglaterra. Hosi sira lubun ne’e,
balun servisu no balun eskola, balun halo business hodi mellora kualidade
ba vida moris. Ho motivus hadi’a moris rasik no tulun família, no mós tanba
ki’ak no dezempregu, timoroan sira barak desidi ho hili dalan sai ba rai-li’ur
i Inglaterra mak sai fatin preferido.
Kontribuinte: Dalia Agostinho
Kiakilir | Editór: Francisco Simões
Imajen: Elisio Ximenes, timoroan,
ne’ebé manan premiu loteria 58.000£ iha Inglaterra. Imajen espesiál
Sem comentários:
Enviar um comentário