José Gonçalves: Tinan 2022, mina Bayu Undang sei maran

Country Manager, ConocoPhillips, José Lobato Gonçalves informa, tuir estimasaun husi ConocoPhillips mina iha kampu Bayu Undang sei maran iha tinan 2022, tanba iha 2004 hahú produsaun mina iha kampu Bayu Undang, nune’e laiha ona kapasidade atu kontinua produz mina durante tinan naruk.

“Ami halo update kona-bá lala’ok iha Bayu Undang ni’an, produz ona hira no tempu hira mak sei kontinua halo produsaun, Bayu Undang sei hala’o tan produsaun tinan rua ka tolu, ne’ebé fulan marsu, tinan 2021 to’o  2022, ida ne’e mais provable no fulan Janeiru, tinan 2022 produsaun ne’e bele remata, ida ne’e mak estimasaun tékniku no sei fó reseita ba Estadu Timor-Leste entre USD billaun 0.7, USD millaun, 700 to’o USD billaun 1.7, tanba reseita depende husi produsaun no husi folin mina“, Country Manager-ConocoPhillips ba jornalista sira, hafoin hala’o enkontru  ho Sekretáriu Jeral (SekJer) FRETILIN, iha Comite Central FRETILIN (CCF), Comoro-Díli, Kinta (08-08-2019).

Husi sorin seluk, SekJer FRETILIN, Mari Alkatiri hateten, tuir ConocoPhillips nia kalkulasaun iha tempu badak Bayu Undang sei maran, tanba ne’e  ConocoPhillips halo ona negosiasaun ho Timor Gap no mós  Autoridade Nasional Petróleu no Minerais (ANPM).

“ConocoPhillips ne’e operador ba Bayu Undang, iha konsórsiu empreza  boot liu no responsabel halo jestaun operasional no sira nia kálkulu tempu naruk liu mak tinan 2022, tempu médiu mak Janeiru tinan 2022 no tempu atu maran mak iha tinan 2021, tanba ne’e ConocoPhillips halo negosiasaun ho Timor Gap ho ANPM atu prepara bainhira atu hotu, tenki prepara atu hasa’i besi tua sira husi tasi no infraestrutura seluk rai maran iha Darwing-Australia no Timor-Leste sei gasta tan mínimu USD billiaun 1, la’os  Timor- Leste deit mak sei hasa’i kustu produsaun fundu petrolíferu, maibé  konsórsiu ne’ebé involve mós sei hasa’i kustu hanesan, konsidera ida hanesan projetu ida”, tenik SekJer FRETILIN ne’e.

Enkontru ne’e partisipa husi reprezentante ConocoPhillips, hanesan Vise Prezidenti Sustentabel Komunikasaun no Asuntu Externu Negósiu Australia Oeste, Kayleen Ewin, akompañia husi Country Manager, ConocoPhillips, José Lobato Gonçalves, Vise Prezidenti ba Operasaun Perfurasaun no Avastesimentu, David Voile. Ety

GMN TV | Grupo Média Nacional