Selebrasaun Referência, Hatudu Istória ba Jerasaun Foun

GLENO, 11 agostu 2019 (TATOLI)-Selebrasaun loron Konsulta Populár (Referendu) ba dala-20 (30 agostu 1999-30 agostu 2019) ho prezensa forsa INTERFET iha TimorLeste, 20 setembru 1999, hanesan sinál ida hodi hatudu hela istória ba jerasaun foun sira atu hatene istória kona-ba lala’ok luta povu Timor-Leste nian to’o ukun rasik aan.

José das Neves “Sama La Rua”, estafeta direita hosi Komandante ein-Xefe FALINTIL, Kay Rala Xanana Gusmão, afirma katak, selebrasaun loron sira ne’e importante tebes ba povu atu kontinua afirma istória sira ba jerasaun foun.

Eis Komisáriu Adjuntu Komisaun Anti Korrupsaun (CACsigla portugés) ne’e fó hanoin katak, juventude sira presiza hatene duni sakrifisiu hotu inan-aman no bei-ala sira nian iha prosesu luta ida ne’e.

Liuhosi selebrasaun loron konsulta populár no prezensa forsa INTERFET nian ne’ebé hala’o iha loron daruak nian iha Munisípiu Ermera, sábadu (10/08/2019), José Neves “Sama La Rua” hamutuk ho entidade relijiozu, juventude, ferik-katuas, labarik, veteranu ho autoridade Ermera, halo prosesaun hodi lori ai-funan ho lilin ba sunu ho kari iha Osóariu Munisípiu hodi fó onra no domin boot ba as-ua’in sira ne’ebé mate tanba defende rai doben Timor-Leste nia soberania no independénsia.

José Neves “Sama La Rua”, eis Ministru Edukasaun iha Governu dahituk nian ne’e hateten, masakre lubuk ida mak akontese iha rai doben ida ne’e tanba de’it ukun rasik aan. Tanba ne’e, jerasaun sira otas foun tenke hatene no liuhosi selebrasaun sira ne’e bele fó hanoin ba sira kona-ba istória ‘moruk’ timoroan nian to’o hetan ukun aan.

Aproveita oportunidade ne’e, Sama La Rua, husu ba juventude Timoroan hotu atu haka’as aan aprende no hatene istória Timor-Leste nian, hahú hosi proklamasaun independénsia, 28 Novembru 1975 mai to’o restaurasaun independénsia, 20 maiu 2002.

“Juventude otas foun sira tenke iha ona sentidu katak, nasaun ne’e iha sira nia kabas leten. Ita hotu, liu-liu jerasaun foun sira iha responsabilidade boot ba nasaun ida ne’e nia futuru,” afirma José Neves “Sama La Rua”.

Jornalista: Osória A. Marques | Editór: Francisco Simões

Imajen: Povu Ermera halo prosisaun ba kari ai-funan não sunu lilin iha Osóariu Munisípiu Ermera, Sábadu (10/08/2019). Imajen / Osória A. Marques