PNTL rejista kazu violénsia doméstika 449

DILI, 09 setembru 2020 (TATOLI) -- Durante fulan lima, hahú husi fevereiru too jullu 2020, Polísia Nasional Timor-Leste (PNTL) rejista kazu violénsia doméstika hamutuk 449 maka akontese iha territóriu Timor-Leste. 

Númeru kazu violénsia doméstika ne’e hahú rejista maka’as, tanba vítima hahú komprende katak, problema violénsia doméstika nu’udar kazu públiku presiza hato’o keixa ba autoridade seguransa hodi buka rezolve problema família tuir lisan no tuir lei ba Tribunál. Iha relatóriu PNTL mós halo rekapitulasaun insidente ne’ebé reziste hahú husi fulan fevereiru to’o jullu, tinan ne’e, hamutuk kazu 620. Husi númeru ne’ebé iha tipu kazu ne’ebé maka akontese maka hanesan asaltu/integridade fízika simples, baku-malu ho tuda-malu.

“Númeru kazu violénsia doméstika 449 kazu aas tebes tanba PNTL liu husi Polisiamentu Komunitária halo sosializasaun kona-ba Lei Violénsia Doméstika (VD) ba ita nia komunidade sira, uluk ita nia komunidade sira la hatene saida maka violénsia doméstika, tanba sira hatene de’it katak violénsia doméstika ne’e ba rezolve de’it iha nivel suku ka família, maibé agora kazu ne’e hanesan krime públiku,” hateten portavós PNTL, liuhusi konferénsia imprensa, ohin, iha Komandu Jerál PNTL, Caicoli, Dili.

Arnaldo hatutan, iha primeira semana loron 1 too 9 setembru 2020, PNTL mós rejista kazu violénsia doméstika hamutuk 34 akontese iha territóriu Timor-Leste. 

“Agora daudaun ne’e provizoriamente entre kazu sira-ne’e hotu, violénsia doméstika maka sei rejista aas,” nia hateten. 

PNTL liuhusi Ofisiál Polisia Suku (OPS) koordena ho Autoridade Suku, Organizasaun Naun Governmental (ONG) ne’ebé próteze direitu feto no labarik sira kontinua servisu hamutuk hodi próteze direitu feto sira ne’ebé sai vítima no buka solusaun rezolve problema tuir dalan kulturál no lei nian.

Tuir avaliasaun PNTL nian nota, atu evita númeru kazu violénsia doméstika presiza koordenasaun di’ak entre feto no mane bainhira forma ona família ka uma kain ida tenke evita problema.

Jornalista: Eugénio Pereira ! Editór: Francisco Simões