MAE SEI HADIA HIKAS LIXU SIRA IHA DILI

Ministru Administrasaun Estatal, (MAE) Dionisio Soares Babo informa katak, Ministériu Administrasaun Estatal (MAE), iha planu atu hadia hikas fali, lixu (fatin soe fo’er, red) nian iha kapital Dili laran tomak.

Tanba lixu ka fatin soer foer nian ne’ebé mak balun nia kondisaun aat ona ne’e fó espasu ba animal sira (asu, red) hodi dada sai fali foer sira hodi namkari lemo-lemo iha estrada no fatin públiku.

“Alénde hadia fila fali fatin lixu sira, ne’ebé mak aat. MAE mós loke ona tenderizasaun ba kompaiña sira ne’ebé iha interese hodi halo solda ba kontentór foer nian hamutuk 17 ne’ebé mak aat hotu ona hodi bele uza fila fali tanba kontentór hamutuk 17 hirak ne’e kuaze aat hotu ona”, informa Ministru Dionisio Babo, ba Jornalista sira iha nia servisu fatin Colmera, Dili, Segunda (11/5).

Dionisio Babo akresenta katak, presiza hadia duni fatin lixu sira nian ne’e, tanba komunidade sira soe foer latuir nia fatin.

“Ha’u hanoin foer fatin sira iha kapital Dili ne’ebé mak aat hotu ona ne’e, ita sei sobu no hadia fila fali, atu nune’e komunidade sira bele ba so’e foer. Tanba tuir lolos iha Dili ne’e mós, maibé tanba komunidade rasik mak laiha konsénsia atu bele hamos,”dehan Dionisio Babo ba Jornalista sira iha nia servisu fatin, Colmera, Segunda, (11/5).

Dionisio Babo hatutan katak, kuaze dalan protókolu kapital Dili nian ne’e sei infeita ho foer.

“Komunidade labele hein deit Governu maibé tenki iha konsénsia rasik hodi hamos idak-idak nia uma hun, inklui estrada ne’ebé sira hela ba tanba impaktu husi foer la’os Governu mesak mak sei hetan maibé komunidade sira mak sei hetan. Tanba ne’e tenki halakon hahalok dependenti”, nia dehan.

Nia hatete oras ne’e dadauk MAE mos prepara hela draf lei ida hodi fo autoridade bot liu ba Munisipio Dili hodi sai nudar kapital Dili nian ne’ebé organija diak liu tan mak hanesan sei halo urbanijasun urbana ne’ebé sedeit mak halo uma iha Kapital Dili tenki iha lisensa konstrusaun no seluk tan no seluk tan.

“Tanba ne’e antes ne’e hau husu deskulpa ba komundiade kapital Dili ne’ebé karik aban bainrua afeitado hodi hasai karik tenki simu tanba nudar sidadauk Timor oan ne’ebé diak tenki kopera malu,” MAE, husu kompresaun.ina

Jornal Nacional Diário