Emprezariu timoroan sira tenki aproveita empreza internasional

DILI - Emprezariu timoroan sira tenki aproveita empreza internasional ne’ebé mai partisipa iha Expo Internasional iha Timor-Leste semana foin liuba. Minsitru ba Obras Publika Transporte no Komunikasaun, Gastão Francisco de Sousa hatete lia hirak ne’e ba jornalista sira bainhira partisipa iha serimonia lansamentu ba Expo Internasional setor konstrusaun iha Timor Plaza.

“Hau hanoin expo ne’e diak maibe buat hotu ita nia emprezariu timoroan sira tenki aproveita material sira ne’ebe empreza internasional sira lori mai hatudu iha expo internasional ne’ebe halao foin lalais iha Timor Plaza ne’e,” Ministru Gastão apela liu husi jornalista hafoin remata vizita hodi hare direita produtu ne’ebe empreza internasional sira hatudu iha loron expo seman liu ba.

Tuir observasaun jornalista nian iha Expo ne’e partisipasaun emprezariu lokal ne’ebé iha interese ba produtu konstrusaun ne’e ladun maximu, maski iha expo ne’e sasan konstrusaun oioin husi kompañia produtor oioin mak hatudu ka pamer. Gastão hatete liuliu ba empreteiru konstrusaun nian atu labele sai penonton deit ba dezenvolvimentu iha rai laran maibe tenki involve an para aprende netik buat diak husi emprezariu husi rai liur. 

Tuir nia hanoin, expo hodi konvida kompañia produtor ekipamentu pezadu ba konstrusaun nian ne’e pasu diak ida ba oin. Nia husu emprezariu timoroan tenki involve an para hetan netik material ruma husi matenek nain sira lori husi rai liur mai. “Ita tenki aprende, ita foin ukun an tinan sanulu rein tolu tanba ne’e ita buka absolve ita nia an tuir kondisaun real ne’ebe ita nia iha,” ministru dehan. Nia mos husu ba empreza timoroan nian bele iha ligasaun ho empreza boot sira mai tuir expo ne’e hodi halo akordu ruma join operation.  “Ne’e hanesan parte ida aprende saiida mak kompañia bobot sira ne’e halo,” governante ne’e esplika.

Entretantu Adi hanesan training enginering iha International Labour Organization (ILO) Timor-Leste hatete, eventu ida ne’e bele hamosu hanoin ruma tan atu nune’e timoroan bele  dezenvolve di’ak liu tan kualidade konstrusaun iha Timor-Leste. Tuir nia katak promosaun  di’ak ida atu hotu- hotu  bele iha posibilidade. Tanba dala ruma ita mesak de’it iha ita nia servisu fatin visibilidade ne’e menus. Ho oportunidade ida ne’e bele haree ho moos tanba ema barak tau interese, liuliu estadu tamba liu husi  expo refere  bele fo capacity building. 

Nia dehan tan antes ida ne’e sira nia parte mos servisu hamutuk ona ho ministeriu balun hanesan ministerio de estado de Economica, alende ne’e ministeriu obras publica tamba expo nia programa hare liu ba area konstrusaun hanesan konstrusaun estrda rural. Engineriu timoroan ne’e mos sujere atu expo ne’e tenke mantein no hadi’a nafatin, maske ita hahu buat ruma sempre iha falta barak. “Aleinde  ne’e ita mos bele prepara án di’ak liu tan, atu nune’e bele aprezenta di’ak liu tan ita nia produtu ruma ka ita nia servisu ruma ba ema seluk atu nune’e ema seluk bele tau sira nia interese ba saida mak ita aprezenta.” (BT)

Business Timor - Roly/Ej-3