XANANA GUSMÃO: “HAU KOMETE KRIME BA TRIBUNAL”

Ministru Planeamentu Investimentu Estratéjiku (MPIE), Kay Rala Xanana Gusmão, hatete, nia prontu atu ba hatan iha Tribunal, kuandu nia desizaun kona-ba kansela hotu implementasaun Projetu Dezenvolvimentu Desentralizadu (PDD), Programa Dezenvolvimentu Integradu Distritál (PDID), inklui Planu Nasional Dezenvolvimentu Sukus (PNDS) ne’e krime.

Eis Primeiru Ministru iha V Governu Konstitusional ne’e subliña, nia kansela hotu projetu PDID, PDD sira no PNDS tanba durante ne’e buat balun la’o lalos.

“Se dehan ha’u komete krime, ha’u hein ba Tribunal, ha’u ba Becora ba maka imi vizita ha’u,”katak Xanana Gusmão ba jornalista sira iha Sentro Nasional Rehabilitasaun Becora, Dili, Segunda (11/5), relasiona ho emprezariu nasional balun hatete katak, Xanana Gusmão komete krime, tanba kansela hotu projetu PDID, PDD no PNDS, maske projetu balun kompañia sira finaliza tiha ona.

Xanana Gusmão hasai ona karta despaixu ida hodi kansela hotu implementasaun Projetu Dezenvolvimentu Desentralizadu (PDD), Programa Dezenvol vimentu Integradu Distritál (PDID), inklui Planu Nasionál Dezenvolvimentu Sukus (PNDS), hodi halo fali tender foun, tanba tuir Xanana nia haree, durante ne’e projetu barak maka la’o lalos.

Xanana kansela hotu projetu PDD,PDID no PNDS ne’ebé nia konkursu ne’e sai ona iha tinan kotuk no tinan ida ne’e, tanba sestu Governu ne’e, nia maka lidera hotu projetu sira ne’e.

Xanana kansela hotu projetu PDD,PDID no PNDS sira ne’e, tanba nia hakarak halo fali konkursu ka tender foun hodi haree durante ne’e servisu ida ne’e, kleuk iha ne’ebé no los iha ne’ebé.

Programa Dezenvovlimentu Integradu Distritál (PDID) Governu aloka 34,4 milloens dolares hodi kontinua implementa projetus nivel lokal, atu nune’e bele mellora substansialmente vida komunidade nian.

Antes ne’e, Vise Ministru ESTATAL, Tomas Cabral, hatete katak, PDID kansela hotu tiha lai, nia (Xanana) ba mak foin loke fali.

“Ami inisia tiha ona prosesu dokumentus ba kontratu PDID ho karta ida sai ne’e kansela hodi hein Ministru foun. Ne’ebé sira iha distritu sosa tiha ona dokumentu hein Ministru foun mak foin mak atu loke fali konkursu ka atu avalia fali dokumentu sei hein Ministru foun,”Dehan Tomas Cabral.

Tomas Cabral hatutan, maske durante ne’e programa PDD-PDID no PNDS balun implmenta ona, no projetu balun kompania sira foin sosa dokumentus, maibe Xanana haruka hapara hotu.tap

Jornal Nacional Diário