Konferénsia Nivel Ministru Justisa CPLP, Sei Aprezenta Konaba Trafik Humanu No Korupsaun

Ministru Justisa, Ivo Valente, Kinta feira (18/06), hala’o konferénsia imprensa hodi informa ba públiku kona-ba Konferénsia Nivél Ministru Justisa Países Língua Ofisiál Portuguesa ba dala XIV, ne’ebé sei realiza iha 22-23 fulan Juñu 2015 iha Salaun Konferénsia Ministériu Negósiu Estranjeiru no Kooperasaun (MNEK) Dili, Timor-Leste (TL).

Liu husi nota komunikadu imprensa ne’ebé redasaun Jornal Nacional Diário simu husi Ofisiál Relasaun Públika.

Ministériu Justisa, Kinta feira (18/06) ne’e, informa katak, konferénsia imprensa ne’e, akompañadu husi Diretora Jerál Ministériu Justisa no Ministru Justisa hateten, “konferénsia ne’e, nasaun Repúblika Demokrátika Timor-Leste sai nu’udar uma na’in, ho ida ne’e hanesan pasu istóriku ida ba nasaun Timor-Leste nu’udar parte komunidade Língua Ofisiál Portugues nian, Timor-Leste partisipa iha reuniaun altu nivel nian alargadu hahú husi 2003 iha Brasil no kontinua halo parte ativu iha nasaun CPLP nian iha domíniu justisa. Konferénsia ba dala XIV iha Timor-Leste, ita Timor-Leste iha parte Ministru Justisa ba nasaun Língua Portuguesa hanesan mós konferensia internasionál ne’ebé hala’o dala ida kada tinan rua.

Nota imprensa ne’e esplika katak, objetivu prinsipál husi konferénsia ne’e mak oinsa pomove no dezenvolve nasaun sira ne’ebé mak hola parte hanesan nasaun sira ho língua Ofisiál Português nian.

Iha konferénsia ba dala XIV iha Timor-Leste ne’e, Ministru Justisa Ivo Valente akresenta liu tan, “Timor-Lete hili tema prinsipál ba XIV mak hanesan, “Propriedade rai nu’udar fatór dezenvolvimentu”, tema ida ne’e importante ba países CPLP atu dezenvolve komunidade iha ámbitu países ho língua ofisiál Portuguesa nian.

Durante konferénsia sei rona ka aprezenta rezultadu servisu husi komisaun servisu nian husi konferénsia ne’ebé hala’o uluk ona iha Mauputo, iha rezultadu rua mak hanesan, dahuluk kona-ba Tráfiku Humanu no daruak kona-ba korrupsaun i tranzaksaun internasionais”.

Iha fatin hanesan, Diretora Jerál Sentru Formasaun Jurídiku, Marcelina Tilman ne’ebé asume kargu hanesan Prezidenti Komisaun Organizadora ba Konferénsia ne’e hateten, iha konferénsia ne’e sei partisipa husi Ministru Justisa Língua ofisiál Portuguesa na’in hat hanesan, Cabo-Verde, Guiné-Bissau, Moçambique no São Tomé e Príncipe no Portugal (Sekretáriu Estadu), Brazil (Representação) no Angola (Diretór Jerál).

“Wainhira konferénsia remata entre Ministru Justisa nasaun sira ho língua ofisiál Portugues sei asina deklarasaun hamutuk ida kona-ba protesaun internasionál ba labarik iha espasu países CPLP nian no ha’u apela ba komunidade Timor-Leste tomak, liu-liu komunidade ne’ebé hela iha Dili atu fó apoiu ba konferénsia Ministru Justisa nasaun sira ho lingua ofisiál Portuguesa ne’e atu la’o ho susesu”, hateten Ivo Valende hafoin konferensia imprensa nia rohan.

Dokumentu informasaun ne’e mós hateten katak, bainaka sira husi nasaun língua ofisiál Portuguesa ne’ebé nu’udar korespondente nasionál sei to’o iha Dili, horseik, iha loron 18 fulan Juñu no bainaka VIP sira sei to’o iha Dili iha loron 20-21 fulan-Juñu tinan 2015.*/ixo

Jornal Nacional