MS ABANDONA BOLSEIRUS KEDIRI 76

Hospital Nacional Guido Valadares (HNGV), dau-daun ne’e falta rekursu humanu ba area analiza ran iha laboratóriu, maibe Ministeriu Saúde rasik lakohi aproveita bolseirus 76 ne’ebe ba hasai diploma trez (D3) iha Institut Ilmu Kesehatan (IIK) Kediri, Surabaya-Indonesia.

Iha tinan 2014 liu ba, Governu liu husi Ministeriu Saúde hasai bolsu estudu ba Kediri-Surabaya durante tinan tolu (3), atu bele atende nesesidade hospital nian, maibe realidade to’o agora Ministeriu Saude seidauk koloka finalist sira tuir ida-diak nia area.

Bolseiru nain 76 ne’e kompostu husi enfarmajem nain 39 no analiza ran nain 37.

Bolseiru IIK Kediri, Maryanti de Jesus Axis senti MS abandona sira, basa desde remata estudu diploma trez ba area laboratoriu iha Kediri-Surabaya iha loron 3 Outobru 2014 to’o agora sidauk koloka sira ba fatin servisu.

“Kuaze fulan hitu nia laran ami mai halimar deit iha uma, dala ruma ami ba ajuda klinika sira ho volontariu hodi pratika ami nia matenek ne’ebe durante ne’e hetan iha ami nia estudu,”haklaken Maryanti ba JN-Diario foin lalais ne’e.

Tuir nia katak, hetan fiar husi Governu hodi hetan bolsu estudu iha ema nia rain, nune’e remata bele kontribui fali ba nasaun, maibe realidade hasoru oin seluk.

“Ha’u la komprende ho proseu MS nian. Ami bolseiru MS nian ne’ebe antes ne’e apply tiha ona ba fatin ne’ebe atu servisu. Hanesan hau apply ba iha Centru Saude Bairu Formosa, entaun bainhira remata hau ba tama servisu deit ona tanba tuir tiha ona tes, maibe agora oin seluk, hau tenki tuir fali rekrutamentu, liu mak ba servisu,” tenik Maryanti.

Iha parte seluk, Xefi Unidade Banku de Sangue HNGV, Arsenio Jose Afonso dehan ba JN-Diario iha nia servisu fatin HNGV Bidau, Segunda (8/6) katak, agora dau-daun falta rekursu humanu iha area laboratoriu nian.

“Iha tinan hirak liu ba ami konsege hala’o aktividade movel duasaun ran iha Muinispiu Baucau no Bobonaro, maibe agora ami labele avansa tanba laiha rekursu humanu no transporte,”informa Arsenio.

Nia hatete, antes ne’e iha kareta modelu Mini Bus maibe at ne’ebe hala’o hela manutensaun, tanba ne’e mak programa movel duasaun ran iha Munisipiu no institusaun Estadu paradu.

Tuir organizasaun Saude Mundial WHO katak, kada institusaun saude liu-liu unidade Banku de Sangue tenki iha ema nain 25 no minimu nain 18, maibe Banku de Sangue TL iha ema nain 11. Husi nain 11 ne’e kompostu husi tekniku analiza ran iha laboratoriu, volontariu nain rua, funsionariu permanente nain sia (9) inklui xefi unidade.

Maske nune’e, ekipa traballu Banco de Sangue sempre esforsu an hodi mantein hala’o knar tuir limitasaun ne’ebe iha, tanba pasiente ne’ebe presija ran kada loron sempre aumenta.

Tantu stok ran ne’ebe dau-dauk ne’e hamutuk 67 ho marka (golongan darah) A iha 18, B iha 15, AB iha 4 no O iha 30.

Hatan ba prekupasaun refere, Diretur Rekursu Humanus MS, Duarte Ximenes afirma, bolseru Kediri inklui sira seluk ne’ebe oras ne’e iha ona Timor Leste ne’e, laos abandona. Maibe sei hein prosesu rekrutamentu husi MS rasik.

“MS hato’o ona karta ba Primeiru Ministru Rui Maria de Araujo iha 25 Abril liu ba, nune’e agora MS prepara hela referensia atu loke vagas iha tinan ida ne’e nia laran,”dehan Duarte.

Nia esplika, normalmente bolserus Timoroan bainhira remata estudu iha rai liur mai, tenki liu husi prosesu no sei han tempu to’o fulan tolu (3) tanba mudansa struktura Governu.

Maibe Diretur ne’e espera katak, prosesu rektutamentu sei hakotu iha tinan ida ne’e, atu estudante sira ne’ebe hetan ona fiar no remata ona sira nia estudu bele hala’o sira nia kna’ar tuir sira nia estudu.Ola

Jornal Nacional