LOJIKA KA LAE, OSAN DEZ DOLLAR DEIT !

Jornal Nacional, editorial

Kuandu haree husi kargu politiku lobuk tebes mak Saudozu Fernando Lasama de Araújo asumi durante iha tempo ukun rasik an, ne’ebe asves ema hanoin katak Saudozu Lasama tama iha lista ema nebe riku ka iha osan, iha uma luxu no kareta barak.

Maibe pelo kontrariu, Saudozu mate husik hela konta bankaria Banku Mandiri nian ho deit osan dez dollar Amerikanu (US$10.00) no iha informasaun balu nebe lao iha publiku katak konta bakaria iha BNU ho osan 300 Dollar Amerikanu, seidauk hatene konta bankaria husi banku seluk nian.

“Ha’u ba cek Saudozu nia saldo iha konta bankaria Mandiri iha deit osan US$ 10.00 no balu dehan U$D 300 ne’e iha nia konta bankaria BNU karik,’’ Marcelino Magno.

Alem de osan, Saudozu iha kareta privadu ida, maibe antigu ona no gripa tiha ona no   uma privadu iha Ailok Laran, ne’e antes Saudozu mate hekerek tiha ona karta (wasiat) katak, uma ne’e entrega ba nia oan mane Hadomi no iha uma ida iha Delta, ne’ebe hanoin ona atu fo ba nia fen bot, maibe sei iha prosesu legalizasaun.

Publiku bele fiar eh bele mos la fiar ‘harta gono gini’ Lasama nian tamba kargu sira nebe Lasama asumi nee laos salariu nebe kiik, Vice Ministru Negocius Estranjeirus iha UNTAET nian tempo, membru Asembleia Konstituante 2001 no Deputado Parlamentu Nasional 2002, Presidente Parlamentu nasional iha 2007 – 2012, Vice Primeiru Ministru Governu V governu Konstituisonal (2012 – 2015) no Ministru Edukasaun e Ministru Koordenador ba Asuntu Sosiais iha VI Governu Konstituisonal 2015 nebe servisu deit loron 106.

Laiha duvia katak iha tempo UNTAET nian, membru Asembleia Konstituante no membru parlamentu iha primeiru lejislativa nee sei simu osan oituan tamba Timor Leste seidauk iha osan, governu sei moris deit osan CFET, maibe depois de 2007 mai leten nee Timor ona osan, membru governu mos komesa simu osan diak, salariu ba membru governu kuaze US$3000,00. Sai Presidente Parlamentu Nasional simu salariu 5000, 00 dollar Amerikanu.

Agora pergunta mak nee, osan sira nee ba iha nebe? Gasta ba deit saida? Tamba sai membru governu ka parlamentu nee buat hotu estadu mak responsabiliza. Karika osan sira nee fahe ba militante sira? Ka osan sira nee antes mate foti sai tiha hotu husi banku hodi transfere ba konta bankaria fen no oan nian? Nee so familia mak bele koalia.

Koalia honestemente ka la koalia sai mos laos problema maibe dehan osan deze dollar deit mak iha konta bankaria nee laiha lojika ba ema sira nebe tur iha kargu politika satan sai membru governu no sai ema segundu homen iha pais nee durante tinan lima.

Familia iha direitu atu koalia sai ka la koalia sai, maibe kestaun mak nee osan dez dollar nee atu oinsa bele sustenta fen no oan, fen rua ho oan rua. No mos oinsa pensaun nebe saudozu simu ho ordem Nicolau Lobato grau postu um nee. Pensaun sira nee bele kobre hotu dispensa fen rua no oan rua nee nian, la karik. *

Jornal Nacional, editorial