TL LANSA SENSUS POPULASAUN TINAN 2015

DILI - Iha loron 8 Juñu 2015, Governu Timor-Leste liu husi Diresaun Jerál ba Estatístika (DGE) husi Ministériu Finansas nian ho suporta husi UNFPA no UN Women, lansa Kampaña Sensus Populasaun no Uma-kain Timor-Leste iha Palásiu Governu, Dili. Kampaña nee nia objetivu mak atu distribui informasaun relata no sensus ba datoluk iha nasaun ne’e desde restaurasaun independénsia iha tinan 2002. Sensus ne’e sei komesa hala’o iha loron 11 fulan Jullu tinan 2015.

Primeiru Minstru, Dr. Rui Maria de Araujo suporta hanoin ida ne’e, no dehan katak “Halo planeamentu diak ba ita nia povu sei la realiza bainhira ita la iha idea nebé klaru kona bá karateriska ita nia populasaun nian. Tan ne’e hau iha nee, ohin loron, hodi bele apela ba imi tomak hodi bele hola parte iha Sensus 2015,” dehan Rui. Durante semana hirak nia laran husi loron 11 fulan Juñu nee, enumeradór sira tékniku sira foti dadus sei la’o haleu Timor-Leste nia Munísipiu hamutuk 13 hodi bele hakbesik ba uma-kain ida-idak ho kestionáriu (pergunta) Sensus nian. Kestionáriu hira ne’e sei direta ba xefe uma-kain konabá ema hotu nebé mak hela kalan iha nia rezidénsia iha loron 11 fulan Jullu tinan 2015. 

Subliña importánsia atu hatan pergunta sira nebé mak enumeradór sira sei husu, Eselensia Primeiru Ministru esplika katak “Importante teb-tebes atu ita hotu hola parte iha Sensus, ne’e hanesan obrigasaun síviku ida, no simple tebes. “Imi tomak sei hetan vizita husi ofisial enumeradór sensus nian entre loron 11 no loron 25 fulan Juñu. Enumeradór sira ne’e hetan treinu ona atu koleta dadus sira iha uma-kain ida-idak no sei halo ho segredu. Enumeradór sira sei ba iha uma nain ida-idak atu husu pergunta importante sira nebé mak presiza atu hataan ho onestu, ho los. Keta haluha, ita hotu nia resposta importante no sei forma polítika no programa loron oin ita nia nasaun nian,” dehan Rui 

Objetivu husi Sensus nian ba atu halibur informasaun konabá Timor-Leste no nia demografia, karaterístiku Sósio-ekonomia populasaun sira nian. Informasaun sira ne’e, hafoin sei uza hodi bele monitoriza no define polítika nasaun nian, nia planeamentu no mos nia implementasaun. Tan ne’e, esensiál teb-tebes atu sidadaun hotu hola parte. Diretór Jeral, GDS nian, António Freitas, apela ba rezidente tomak Timor-Leste nian atu bele toma nota ba se deit mak iha iha sira uma-laran iha loron 11 fulan Juñu no sira nia detallu personal, no bele koopera ho enumeradór sira. 

“Husi loron 11 too 25 fulan Jullu, preparadu ba, loke odamatan ba enumeradór sira, inklui aan iha konta sensus ne’e no senti orgullu ba nasaun ne’ebé mak halo planeamentu bazeia ba dadus sira nebé mak los no ezatu hodi bele reforsa ita nia demokrasia,” dehan Antonio. UNFPA no UN Women kontribui mos ba iha esforsu husi DGE nian, Ministeriu Finansas no Governu Timor-Leste en jerál, atu organiza Sensus no mos parte publikasaun nian.

UNFPA involve aan ona mos iha Sensus rua liu ba iha tinan 2004 no tinan 2010 iha Timor-Leste no sente haksolok bele kontinua involve iha Sensus 2015 nian mos. Ba Sensus tinan 2015 nee, UNFPA prinsipalmente sai hanesan suporta tékniku nian no mos publisidade ba tinan 2015 nian. UN Women kontribui ba Sensus tinan ida nee nian iha parte tékniku, inklui mos publisidade, treinamentu ba enumeradór sira atu bele garante katak informasaun konabá sidadaun no rezidente sira hotu, inklui feto no labarik feto sira, sei hatama iha dadus ho númeru loloos. (BT)

Business Timor - Pedro