HASORU ELEISAUN 2017, FRETILIN HAMETIN ESTRUTURA JERASAUN FOUN IHA BAZE

Partidu historiku FRETILIN, kada semana kontinua hala’o konsolidasaun ba estrutura partidu nian iha baze, li-liu ba jerasaun foun sira ho objetivu, hametin unidade no estrutura partidu, hodi prepara’an ba eleisaun jeral 2017.

Kordenador Komisaun Politika Partidu FRETILIN Postu Administrativu Naifeto, Paulo Soares, informa katak, bainhira kuandu FRETILIN re-estrutura ninia estrutura iha baze, iha orientasaun balu ne’ebé sira simu husi Comite Central FRETILIN kona-ba politika kuadrus partidu nian iha baze.

Nia haktuir, planu no programa ne’ebé kordenador no Komisaun partidu FRETILIN iha baze tenke halo mak, tenke hasoru malu bebeik hodi hametin unidade i estrutura partidu FRETILIN ninian, iha Postu Administrativu hotu.

“Iha ami nia Postu Administrativu Nai Feto, ne’ebé kompostu husi Suku nen (6), Aldeia 38, hasoru malu kada semana ida dala ida, atu liu husi aprosimasaun ida ne’e, bele hametin unidade no estrutura partidu FRETILIN ninian,”informa Paulo Soares ba jornalista sira hafoin enkontru ho Kuadrus Partidu FRETILIN nian iha Aldeia 03, Suku Culuhun Baixo, Suku Acadiru-Hun, Postu Administrativu Nain Feto, Munisípiu Dili, Dominggu (05/7).

Nia hatutan, preparasaun ida ne’e, FRETILIN hakarak konsolida hodi prepara ba komfrensia Kongresu Partidu FRETILIN nian, no eleisaun 2017.

“Katak, ami atu hametin ami nia partidu, hametin joventude FRETILIN, liu husi komfrensia Joventude FRETILIN, no kongresu FRETILIN nian, hodi ba to’o iha eleisaun 2017,”tenik nia.

Paulo Soares esklarese, atu prepara ba eleisaun Prezidensial no Parlamentar 2017, Kordenador Partidu FRETILIN sira iha Posto Administrativu, li-liu iha Postu Administrativu Nai Feto preparadu, tanba kada semana, Kordenador partidu FRETILIN sira iha kada Suku sempre konsolida membru partidu sira liu husi enkontru hanesan ne’e.

Nia haktuir, jerasaun foun partidu FRETILIN ninian sei halo esforsu tomak atu hodi hametin estrutura FRETILIN iha baze, ba eleisaun 2017. Maibé nia esplika, kestaun manan ou la manan eleisaun ne’e, kestaun teknika, maibé kestaun politika, responsabilidade politika sira tenke hala’o no halo konsolidasaun politika hodi hametin liu tan estrutura partidu nian iha baze.

“Enkontru ne’e ita bele dehan, kosolidasaun estrutural. Signifika katak, ami sira ne’ebé iha estrutura laran, hodi konsolidade membru Partidu FRETILIN hot-hotu atu hatene sira nia responsabilidade. Tanba la signifika katak, ita tenke manan uluk mak foin hala’o konsolidasaun, maibé ita hala’o uluk mak ita hein rezultadu eleisaun nian,”relata nia.

Paulo soares haktuir, Kordenador Partidu sira tenke organiza no mobiliza, atu fó ajitasaun programa iha baze, mak foin hein rezultadu, la’os rezultadu mai tiha mak hot-hotu halai ba mai.

Iha reuniaun ne’e mós, Kordenador Partidu FRETILIN Postu Administrativu Nai Feto nian ne’e, aprezenta kona-ba lista joventude foun FRETILIN ne’ebé mak durante ne’e sira rekolla hodi entrega ba Comite Central FRETILIN katak, joventude sira ne’e, preparadu ona atu tuir komfrensia Partidu FRETILIN nian hamutuk 153.

Pauo Soares relata, komesa agora ba futuru, Kordenador Partidu FRETILIN nian iha suku sira, sei komesa la’o ba aldeia hotu atu dadus kona-ba joventude FRETILIN nian ne’ebé mak namkari iha kada Aldeia.cos

Jornal Nacional