TAUR SEI VIZITA SUKU TAPO-MEMO

DÍLI - Prezidente Republika, Taur Matan Ruak iha tempu badak sei vizita suku Tapo-Memo, postu administrativu Maliana, Munisipiu Bobonaro.

Iha loron Tersa (07/07), ekipa ne’ebé reprejenta komunidade hosi suku Tapo no Memo, halo aundensia ho Assesor do Serviço de Apoio Politico Presidênsial da República , Filipe da Costa, hodi husu atu Xefi Estadu Taur Matan Ruak para bele vizita populasaun iha suku rua ne’e.

Iha aundensia ne’e, Assesor Filipe da Costa simu ekipa hosi Suku Tapo-Memo ho diak tebes.

Ami nia ekipa ne’e koalia direita ho Assesor do Serviço de Apoio Politico nian oinsa mak bele iha tempu badak nia laran Prezidente da Repúblika Taur Matan Ruak vizita mos ba ami nia suku Tapo no Memo. Iha parte seluk Assesor do Serviço de Apoio Politico hatan ba ami nia pedido koalia direita nee hatete katak “Ha’u sei koalia ho Prezidente da Repúblika politika oinsa mak PR Taur Matan Ruak bele vizita ita boot sira nia suku” hatete Xefi Suku Gaspar de Jesus da Conceição liu hosi karta komunikadu ne’ebé Timor Post asesu horiseik.

Xefi Suku Gaspar de Jesus da Conceição afirma, Prezidente Republika, Taur Matan Ruak sei halo vizita ba komunidade iha suku Tapo no Memo.

“Ami ho komunidade hamutuk ho intelektual Tapo no Memo-oan kontenti tebes atu simu Prezidente, i ami sei halo preparasaun sei konvida Administrador Municipiu Bobonaro, Administrador Postu Administrativu Maliana, Komandante Polisia Bobonaro, Komandante Postu F-FDTL Tunubibi, Igreja, Veteranus Municipiu Bobonaro, Estudante iha suku Tapo-Memo rasik, inklui mos suku sira seluk atu hola parte,” tenik nia. (*/1j1)

Timor Post, Loron Kinta-feira, 09 Jullu 2015