TRABALLADORES TIMOR LODGE GREVE – ROGERIO LOBATO “SILU” PORTAVOS

Traballadores husi empreza Timor Lodge, Kinta dader (3/9/2015), konsentra halo greve hasoru empreza tanba konsidera empreza la fo kompensasaun ba traballador ne’ebe maka servisu tinan barak nia laran.

Asaun greve ne’e nudar solidaridade ne’ebe maka traballadores sira halo ba nia maluk ne’ebe servisu iha Timor Lodge no fila hikas ona ba Aman Maromak Nia Kadunan Santo, maibe empreza la fo kompensasaun ba familia indultadu.

Greve ne’e mos hetan apoiu husi Sindikatu Front Traballador Maubere (FORAM) hodi reklama ba empreza atu kumpri lei traballadores ne’ebe maka vigora ona iha rai ida ne’e, liu-liu kona-ba direitu kompensasaun ba trabalhadores sira.

Timor oan sira ne’ebe servi iha Timor Lodge senti empreza la iha nosaun ba sira nia direitu tanba sira nia belun traballadores Baser Kamal mate tiha ona, maibe empreza nunka hanoin fo kompensasaun ba familia indultadu ne’ebe sempre mai reklama tuir lei traballadores Timor nian.

Iha asaun ne’e, konsege mosu deskuidu no dezintendimentu oituan, wianhira Direktur Timor Lodge, Rogerio Tiago Lobato, nudar mos eis Ministru Interior, sai diretamente mai kaer porta vos nia liman “silu” ba kotuk hodi rasta tama ba koalia iha hotel laran.

Manifestasaun ne’ebe hahuu husi tuku 10:00-tuku 14:00 OTL, la konsege hetan nia rezultadu positivu, maibe Rogerio Lobato, promete katak, nia sei koalia ho kampañia nian iha Malaysia. Nune’e, bele fo sai rezutadu.

Rona tiha lia hirak ne’e, trabalhadores sira senti la kontenti no halo asaun taka portaun Timor Lodge nian. Ho nune’e, empreza telefone ba polisia hodi mai halo intervensaun no obriga loke hikas portaun.

Sekretariu Geral FORAM, Letornino da Silva hateten, matebian Baser Kamal, ema estranjeirus mai serivisu iha Timor Lodge to’o mate. Matebian nia fen Timor oan ho nia oan hela iha Dili, tanba ne’e, familia indultadu mai ajiji sira nia aman nia direitu kompensasaun.

Buat ne’ebe la tama iha trabalhadores sira nia rasasino maka wainhira matebian nia oan ba hasoru empreza promete hela deit, mas la realiza kompremisiu para fo kompensasaun tuir lei traballadores nian.

“Matebian servisu iha Timor Lodge durante tinan 15 to’o mate. Nune’e, nia oan mai husu nia aman nia direitu kompensasaun, maibe empreza finzi la hatene tiha no promete hela deit,” hateten Letornino da Silva.

Durante ne’e, trabalhadores ho FORAM deriji ona karta abertu ba SEPFOPE ho PNTL atu bele sai mediador buka solusaun ba problema kompensasaun ne’e, maibe to’o agora la iha resposta.

Traballadores ho FORAM la simu ho objesaun empreza nian ne’ebe fo deit kompensasaun fulan 2 nian husi salariu baziku ba familia indultadu. Basa, matebian servisu tinan 15 nia laran tanba ne’e tenke selu tuir lei.

Iha fatin hanesan Eda Jul Baser Fernandes nudar oan husi matebian hateten, nia la’o halo krime, maibe ejiji nia mana nia direitu kompensasaun.

“Hau hakarak fo kompensasaun tuir lei ne’ebe vigora iha Timor Leste. Fo hotu hau nia aman nia osan ou direitu durante tinan 15 servisu iha Timor Lodge,” hateten Eda Jul Baser Fernandes.

Nia hatutan, dala barak ona nia mai husu nia aman nia direitu kompensasaun ba Rogerio Lobato, nudar direktor, kompanhia Timor Lodge, maibe promete hela deit.

“Hau sei kontinua ejiji hau nia aman nia direitu para bele selu hau nia eskola,” hateten Eda Jul Baser Fernandes. ita

Jornal Nacional