Renovasaun hosi atór polítiku sira sei demora - analista sira

Renovasaun hosi atór polítiku sira iha Timor-Leste bele lori tempu balun to'o mosu ema sira ne'ebé aprezenta diskursu ne'ebé halo liu polítiku sira tempu agora niain, ligadu liu ba pasadu hosi rezisténsia timoroan nian, haktuir avaliasaun hosi analista sira.

"Atu renovasaun akontese, sei presiza iha ema ida ho diskursu foun ida, oin-seluk hosi sira ne'ebé ema haree ona. Ema ida ne'ebé lori diskursu ida oin-seluk hosi polítiku atuál sira hatudu daudaun", hatete hosi Naiara Alves, kordenadora adjuntu hosi Observatóriu hosi Nasaun sira Lian Portugeza nian (OPLOP), ba ajénsia Lusa.

"Hafoin independénsia, instituisaun sira sei hanesan fraku. Nune'e, bainhira iha senáriu polítiku ida ho atór ne'ebé organizadu oituan no ho aliansa konsiderável sira, tendénsia ba konsentrasaun hosi ema sira ne'e iha instituisaun sira sai maka'as liu", hatete hosi investigadora.

Ba Naiara Alves, "karik la'ós hanesan kazu insufisiénsia demokrátiku, tanba Estadu foun harii iha tempu badak, instituisaun sira harii hahú iha tinan 2000, nune'e presiza tempu adekuasaun ida nian, inkluzivu ba organizasaun partidáriu sira seluk hodi harii aliansa ida, ho kapasidade maka'as hodi bele hasoru kandidatu sira ne'e iha urna sira".

Tuir kordenadora hosi OPLOP, timoroan nia moris komun, ne'ebé la'ós militante hosi partidu polítiku ida, "persepsaun hosi polítiku iha relasaun maka'as ho pasadu nasaun nian", ba rezisténsia timoroan nian ba okupasaun indonéziu nian (1975-1999).

Figura sira hanesan eis-primeiru-ministru Kay Rala Xanana Gusmão - ne'ebé husik kargu iha fulan-Fevereiru tinan ne'e -, eis-prezidente José Ramos Horta no atuál Prezidente Taur Matan Ruak, no sira seluk, iha ligasaun maka'as ho rezisténsia hasoru okupasaun Indonézia nian, akadémiku na'in rua ne'e fó hanoin.

"Xanana Gusmão ho Ramos-Horta iha papel importante tebes iha rezisténsia timoroan nian. Figura sira ne'e fó hanoin ba opozisaun, ba rezisténsia hasoru poder indonéziu nian, no nune'e iha apelu ida ne'ebé maka'as tebes iha oras votasaun nian", Naiara Alves hatete.

Tuir investigadora, "ne'e eziji parte sira seluk polítiku nian hodi organiza no bele halo kontaktu ho moris ordináriu, loron-loron, ne'ebé bele lori imajináriu ne'e hosi asuwa'in sira hosi konstrusaun Estadu nian".

"Bainhira Xanana Gusmão sai fali kandidatu, ha'u fiar katak sei sa'e fali ba poder", hatete hosi Luís Carlos Alves de Melo, investigadór no editór hosi OPLOP.

"Bainhira ita analiza situasaun atuál, Xanana Gusmão nia dezisténsia hosi kargu primeiru-ministru, hodi fó nia fatin ba ema ida hosi opozisaun halo ona deskonfortu balun entre partidu sira. Hanesan hahalok furak ida. Ema ida bele kontinua, maibé nia hatete katak nia hakarak atu mosu buat foun sira", Alves de Melo hatutan no avalia hanesan mudansa ida.

Ba Naiara Alves, "primeiru-ministru foun, Rui Araújo, hadook oituan ona hosi pasadu, hosi okupasaun, hanesan preokupa de'it ho diskursu foun ida: saida maka ita hakarak ba Estadu foun ida no buat ne'ebé di'ak no buat ne'ebé tenki muda", refere hosi Luís Carlos Alves de Melo.

Independénsia Timor-Leste nian rekoñesidu de'it hosi komunidade internasionál iha tinan 2002, hafoin kolonizasaun portugeza, hosi domíniu indonéziu (entre 1975 - 1999) no hosi governu ida tranzisaun ONU nian (1999 to'o 2002).

Iha loron 28 Novembru 1975, Frente Revolucionária do Timor-Leste Independente (Fretilin) deklara ona independénsia ne'ebé interompe lalais hosi invazaun indonéziu iha loron 07 Dezembru 1975.

SAPO TL ho Lusa