Fevereiru, Membru Orgaun Soberanu Hetan Pensaun Vitalisia

DILI - Tama Fevereiru 2016, Membru Orgaun Soberanu neebe asumi kargu hanesan Prezidente Republika, Prezidente Parlamentu, Deputadu, Primeiru Ministru, Ministru, Vice Ministru no Sekretariu Estadu iha tinan 2012 kompleta mandatu hodi hetan pensaun vitalisia.

Tuir Prezidente Komisaun G Parlamentu Nasional Asuntu Etika Agustinho Lay Katak Pensaun vitalisia iha regalias neebe mak iha kriteria, laos buat foun iha Timor Leste tamba komesa iha 2007.

Regalias Pensaun vitalisia nee ho ninia kriteria, kriteria fundamental ida mak lista prezensa neebe ema hotu hatene, baze fundamental mak tenki tinan 3 fulan 6 siginifika fulan 42, sura husi agustu 2012,” dehan Agustinho ba STL Tersa (19/01/2016) iha Parlamentu Nasional.

Nia hatete ultrapasa fulan ida nee membru Parlamentu Nasional no membru governu neebe foun iha direitu hetan pensaun mensal ba pensaun vitalisia, atu halo diskusaun ba lei pensaun vitalisia nee problema sidadaun hotu-hotu nian.

Nunee mos deputadu Bankada PD Virgilio Hornai hatete iha Fevereiru agora membru orgaun soberanu sira kompleta ona fulan 42 neebe iha direitu ona hetan pensaun mensal ba pensaun vitalisia nian.

Iha fatin hanesan deputadu Bankada Fretilin Felisberto Monteiro hatete bazea ba konstitusaun no regulamentu Parlamentu Nasional ninian, iha Fevereiru deputadu sira neebe foun iha direitu ona atu hetan pensaun vitalisia. Informasaun kompletu iha STL Jornal no STL Web, edisaun Kuarta (20/1/2016). Timotio Gusmao

Suara Timor Lorosae