KREDITU LABELE SAI RAIKUAK BA SETOR PRIVADU…!!!

Jornal Nacional, editorial

Governu liu husi Ministru Planeamentu Investimentu Estratejiku Kay Rala Xanana Gusmão fo ona lampu verde ba setor privadu nasional sira atu oinsa bele asesu ba kreditu atu bele dudu sira nia negosiu.

Kreditu ba setor privadu laos foin primeira vez mak membru governu sira koalia ba setor privadu sira, pior liu tan iha tinan rua kotuk ba nee governu tau osan kuaze miloens de dolares iha BNCTL hodi fo kreditu setor privado maibe lahatene los kreditu sira nee iha ka laiha, publiku la horon liu iis.

“Buat ida haluha bebeik hanesan todan ida ba Governu maka seidauk kria sistema kreditu ne’ebe diak ba setor privadu presiza teb-tebes. Investimentu ne’ebe tinan ida ne’e Governu tenki deside oinsa maka setor privadu nasional bele hetan apoiu kreditu atu nune’e sira bele dudu a’an involve a’an iha negosiu,” Xanana Gusmão Setor privadu sira sei agradese teb-tebes se saida mak maun boot fo sai nee saiduni realidade tamba ohin loron nee setor privado nasional sira nee infrenta problema finansial atu bele halao sira nia negosiu.

Negosiu ohin loron nee kompetitivu, tantu entre setor privadu sira no entre setor privado nasional no setor privadu internasional sira. Hakarak ka lakohi, prioridade governu tenki ba setor privadu nasional atu nunee sirkulasaun osan kontinua iha rai laran duke ema hasai ba hotu rai liur.

Agora oinsa setor privadu sira nee hetan konfinansa governu se laiha kapasidade finansial hodi halao obras. Se laiha kapasidade finansial, obrigado obra sira nee tenki setor privadu internasional sira .Ne’ebe hanoin atu fo kreditu ba setor privadu nasional sira nee importante teb-tebes atu bele foti kapasidade finansial setor privadu sira nee atu bele kompete obras ho kompanhia sira estranjeru sira nian.

Timor oan sira investe iha sira nia rai laran, kompanhia internasional sira nee la mai investe maibe sira para atu hadau malu projetu ho timor oan. Ba kestaun nee mos tuir lolos governu presisa tau matan tamba kompanhia sira nee buka deit projetu maibe lakohi investe.

Asves publiku komprende dilema governu, tamba kompanhia bobot mai husi rai liur nee mos sira matene teb-tebes, antes atu tama sira buka ema broker, tantu iha governu, iha Parlamentu ka veteranus, ema sira nebe bele influensia teb-tebes hodi prosentu, nee realidade ohin loron nebe nasaun nee infrenta.

Agora pontu fraku nebe setor privado nasional ka empresario timor oan iha mak lakohi investe maibe hanoin mak goza uluk. Simu projetu husi governu, pagamentu oituan tama ona ka governu selu, asve hanoin oinsa atu bele investe liu tan lae, buka mak sosa uluk kareta luxu, pasiar ba komu isin iha Bali no Singapura, osan gasta hotu komesa deve tun sae.

Nunee mos governu, asves hakaas kompanhia sira servisu lalais, obra remata fulan tolu, fulan nen ka tinan ida, governu halo prosesu pagamentu nee ba fulan tolu ba fulan nen, fulan nen ba tinan ida no tinan ida asves too tinan rua, se hanesan nee oinsa setor privadu bele moris ?.

Osan sira nee, setor privadu sira simu so ba selu tiha deit deve, ba selu tiha funan husi imprestimo nee. se governu la hadia mekanismo sira hanesan nee, governu rasik la disiplina ba pagamentu, keta mehi atu setor privadu nee bele moris diak. Ministeriu Obras Publika iha tinan kotuk ba nee halo pra kualifikasaun, kompanhia balu priense kriteriu prakualifikasaun, oinsa sira nebe la tama kualifikasaun, taka ka oinsa, laiha kontinuasaun too ohin loron.

Ohin loron, governu halo took estudus ida ba iha setor privado sira nee, kuaze 80 % setor privado iha problema fiansial, li-liu problema tusan, deve entre kompanhia ida ho kompanhia seluk, balu too gadai sira nia kareta, rai no sasan nebe iha nudar garantia.

Se governu rasil laiha disiplina ba pagamentu mak lalika mehi atu kreditu governu fo setor privadu nasional atu muda, karik pelo kontrariu kreditu nee sai fali rai kuak atu kompanhia nasional sira nee hakohi sira nia an.

Nebe tenki resolve uluk fukun hamosu problema, Ministeriu Finansas ohin loron nee lokoan los ho sira nia sistema free balance. Maibe sistema nee mak durante nee sai impendementu ba prosesu pagamentu. Eh Pior liu tan sistema nee laiha seguransa, ema naok osan iha sistema laran mos governu Ministeriu Finansa lahatene, kazu Boby boy nudar evidensia ba frakeza sistema free balance nee rasik.*