segunda-feira, 18 de janeiro de 2016

FETO TENKI TAU A’AN IHA PRINSIPIU MORAL IGREZA


Administrador Apostoliku e Bispu Diosece Dili no Baucau, Dom Basilio do Nascimento husu ba inan feto sira atu tau a’an iha prinsipiu moral igreza nian nune’e bele redus inan soe bebe iha fat-fatin.

“Ha’u destingi hela buat oin rua, primeiru kondisaun saida mak halo inan feto soe bebe, dala barak sira uja ou tau sira nia isin la tuir kriteriu moral nian, tanba tuir igreza katak relasaun seksual so akontese ba ema ne’ebe iha ona kazamentu nia laran fora de kazamentu labele. Ne’e duni nudar feto tenki tau a’an iha prinsipiu moral hirak ne’e, segundu persiza hatene razaun tansa inan ida bele soe nia bebe,”hateten Dom Basilio do Nascimento ba JN-Diario, iha Lecidere, Dili, Segunda (11/01/16).

Hahalok ne’e mosu, tanba dala ruma mane lakohi responsabiliza bebe ne’ebe mak iha inan ninia kanotak ka isin nune’e halo feto soe ou estraga bebe.

“Klaru ke ema ne’ebe soe oan iha kondisaun dezesperu nia laran, tanba dalabarak mane sira halo tia relasaun seksual i sira halai tia husi responsabilidade no husik hela todan, moe ne’e ba feto, maibe soke liu mai ha’u mak soe fali labarik inosenti ke laiha sala nusamak la husu ba madre ou ema seluk atu hakiak. Ha’u la koalia hanesan bispu senti katak tristi tebes animal deit sei hadomi nia oan, maibe nusa mak ita ema labele,”hateten Dom Basilio.

Husi parte igreza labele halo buat ida, tanba igreza so bele hatutan deit nai maromak nia liafuan no ema idak-idak mak tenki eduka a’an hodi komprende didiak maromak nia ukunfuan.

“Parte igreza labele halo buat ida, tanba igreza so bele hatutan deit maromak nia liafuan atu halo tuir ou lae konformi ema idak-idak mak eduka a’an hodi komprende didiak maromak nia ukunfuan hirak ne’e, maibe atu redus problema hirak ne’e primeiru tenki senti mos ema ne’e nia problema, maibe fundamental liu persiza hatene moris ne’e iha folin ga lae atu nune’e bele fo folin ou kuidadu ita nia isin lolon,”dehan Dom Basilio.

Iha sorin seluk Tereza da Costa, nudar komunidade Aimutin hateten persiza mos konsiensia no edukasaun forte husi inan aman sira ba oan, tanba dalabarak inan aman husik oan ransu livre ho nune’e akontese isinrua iha liur no mane laiha responsabilidade ho nune’e feto sira moe hodi oho ou buti mate labarik. Ita/LJ4

Jornal Nacional

Sem comentários: