PR TAUR ALERJIA HO AUTO ESTRADA

Prezidenti Republika (PR), Taur Matan Ruak, alerjia ho politika auto estrada ne’ebe Governu sempre koalia, tanba to’o oras ne’e, estrada sira iha teritoriu Timor laran tomak grave tan deit.

PR Taur Matan Ruak, hateten katak, nia lakohi rona liafuan ida ne’ebe mak Governu bai-bain dehan, auto estrada tanba situasaun estrada la merese duni atu hanaran auto estrada.

“Hau lakohi koalia auto estrada, tanba nornalmente auto estrada ne’e nia luan metru 70-resin no kareta nadodon lakotu iha auto estrada laran. Hau la hatene ita nia auto estrada ne’e aban bainrua sai hanesan ne’e ka lae,” afirma PR Taur Matan Ruak, bainhira halo dialogu komunitaria ho komunidade Suku Barikafa, Postu Administrativu Luro, Munisipiu Lautem, Kuarta (20/01/2016).

Xefi Estado hatutan, Governu planu ona katak atu halo auto estrada husi Suai to’o Viqueque. Tanba ne’e, komunidade sira ne’ebe nia estrada seidauk diak tenke pasensia tanba ministeriu kompetenti mos haslo hela panu atu halo estrada ba povu.

Marcelino da Costa Hornai hanesan komunidade Suku Barekafa husu ba PR Taur hanoin netik sira nia Estrada ne’ebe mak nia kondisaun grave teb-tebes, tanba Estrada kuandu at mak komunudade la bele asesu ba merkadu.

Durante dialogu Prezidente ho komunidade Postu Administrativu Luro, Municipiu Lautem komunidade sira sempre kestiona kona ba kondisaun Estrada, be’e mos nune’e mos problema veteranus ne’ebe mak komplikadu tebes.

Seidauk Inagura Kapela

Biban ne’e, Katekista Suku Barikafa, Domingos Pinto, informa katak, sira nia kapela ne’ebe oras ne’e dadaun konstrusaun remata ona hein deit inagurasaun, maibe seidauk bele, tanba kadeira laiha.

“Hau hakarak husu deit ba PR Taur katak, ami nia kapela pronto ona hein deit halo inagurasaun, maibe seidauk bele tanba banku hodi tur laiha, ne’ebe hau hanesan reposabel ba Igreja ne’e hakarak husu ajuda ba PR Taur,’’ hateten kjatetikas Domingos Pinto.

Hatan ba preukupasaun ne’e, Prezidente Republika (PR), Taur Matan Ruak, hateten katak, durante ne’e prezidesial seidauk ajuda kadeiras ka banku ba igreja no kapela sira.

“Ami durante ne’e seidauk ajuda banku ba kapela ka igreja sira, mas parese iha suku balun ona, maibe kona ba imi nia preukupasaun ami tenta responde, maibe la promote,’’ dehan PR Taur.

PR Taur Matan Ruak fo kedas orientasaun ba asesor politika Prezidensial, Filipe da Costa hamutuk ho Padre Paroquia Luro hakat ba kapela hodi sukat fatin hodi hatur banku. Mia

Jornal Nacional