Sekretáriu-jerál Renamo nian ne'ebé ema tiru transfere hosi Mosambike ba Áfrika-Súl

Sekretáriu-jerál hosi Renamo, Manuel Bissopo, ne'ebé ema tiru iha loron-kuarta iha Beira, iha sentru Mosambike nian, transfere tiha ona ba klíniku ida iha Áfrika-Súl, ne'ebé sei iha observasaun, hatete ohin hosi porta-vós partidu nian ba Lusa. 

Manuel Bissopo "iha hela observasaun, maibé iha ona Áfrika-Súl", hatete hosi António Muchanga, porta-vós hosi Rezisténsia Nasionál Mosambikanu nian (Renamo), hodi adianta katak avaliasaun médiku datoluk hosi kuadru klíniku hanesan desizivu ba nia transferénsia, iha loron-kinta kalan, ba nasaun viziñu.

Sekretáriu-jerál hosi Renamo, partidu prinsipál hosi opozisaun, Manuel Bissopo, ema tiru iha loron-kuarta loraik iha Beira, nia seguransa mate iha fatin, haktuir hosi fonte partidu nian.

Estadu klíniku hosi Manuel Bissopo deskritu iha loron-kinta hanesan "estasionáriu", haktuir hosi porta-vós partidu nian, António Muchanga, hafoin iha loron-kuarta ne'e klasifika hanesan "preokupante", hodi husu tratamentu ida "intensivu no espesiál".

Manuel Bissopo hetan tiru iha bairu Ponta Gea, iha sentru Beira nian, bainhira sai hosi konferénsia imprensa ida hodi fó sai alegadu sira ba naok no oho hosi kuadru sira Renamo nian.

Tuir jornalista lokál sira ne'ebé ko'alia ho Lusa, atiradór sira, ne'ebé tula iha karreta rua, halo blokeiu ba karreta ne'ebé tula Bissopo no hahú tiru.

Sekretáriu-jerál nia guarda-kosta sira mate iha fatin, no sira seluk ne'ebé iha karreta seluk hetan kanek kmaan.

Polísia seidauk iha pista kona-bá atiradór sira no laiha identifikasaun hosi karreta sira ne'ebé uza iha krimi.

Mosambike moris iha situasaun inserteza polítiku iha fulan barak nia laran no líder hosi Renamo ameasa kaer poder iha provínsia neen iha norte no sentru nasaun nian, ne'ebé movimentu hatete katak manán ona iha eleisaun jerál sira iha 2014.

Afonso Dhlakama nia pozisaun sai hanesan debate tanba la mosu iha públiku dezde loron 09 Outubru, bainhira polísia tama iha nia rezidénsia iha Beira no hasai tiha arma no kaer tiha nia guarda pesoal durante oras balun.

Iha deklarasaun públiku sira ne'ebé halo iha loron hirak ikus ne'e, Dhlakama afirma katak fila fali ba Sadjundjira, distritu Gorongosa, maibé sírkulu balun kestiona fiabilidade hosi informasaun ne'e, tanba dispozitivu maka'as hosi forsa defeza no seguransa mosambikanu nian iha zona ne'e.

Foin lalais Renamo husu ona mediasaun hosi Prezidente súl-afrikanu, Jacob Zuma, no hosi Igreja Katólika ba diálogu ho Governu, ne'ebé sei blokeia iha fulan barak nia laran.

Prezidente mosambikanu, Filipe Nyusi, hatudu nafatin nia disponibilidade hodi hasoru malu ho líder Renamo nian, maibé Afonso Dhlakama konsidera katak laiha buat ida maka atu ko'alia hafoin Frelimo xumba tiha revizaun pontuál hosi Konstituisaun hodi simu rejiaun administrativu foun sira ne'ebé reivindikadu hosi opozisaun.

SAPO TL ho Lusa Foto: EPA António Silva