TL LA’OS ALVO ISIS

Prezidenti Komisaun B Parlamentu Nasionál ne’ebé trata asuntu seguransa, David Dias Ximenes ‘Mandati’ hatete katak, isu kona-ba ISIS ne’ebé agora dada’uk la’o iha komunidade nia leet, hanesan propaganda ida husi grupu balun ne’ebé hakarak atu sobu estabilidade nasionál Estadu Timor Leste (TL).

Tanba ne’e, David Dias Ximenes husu ba públiku atu labele ko’alia bei-beik buat ida ne’ebé mak seida’uk iha.

“Ita hakarak Governu ne’e labele di’ak, no labele iha susesu, entaun ita halo buat sira ne’e hodi atividade labele la’o. Ida ne’e ita mak sai fali ISIS ba ita nia maluk sira hotu, tanba ita halo hanesan ne’e, ema hotu ta’uk, laiha atividade ekonomia, ita komesa hakilar malu ona,” dehan David Dias Ximenes ba jornalista sira iha Parlamentu Nasionál, Kinta (21/01).

Nia hatutan, Timor-oan mak sai ISIS ba malu, tanba iha Timor Leste ne’e, intrese politika barak. Maibé David Dias dehan, agora dada’uk ne’e, seguransa no forsa sira mós alerta hela ba informasaun ida ne’e, hodi povu labele trauma.

David Dias dehan, propaganda ida ne’e atu halo Timor-oan sira diskonfia malu hodi halo inimigu ba malu, atu povu labele moris hakmatek.

Nia relata, agora dada’uk ne’e komisaun B Parlamentu Nasionál monitor hela situasaun katak, sei laiha buat ida atu akontese iha Timor Leste.

David Dias esklarese, komisaun B konvida ona Komando PNTL hodi ko’aliakona-ba antisipasaun ba informasaun ne’e. tanba ne’e mak agora dada’uk polisia komesa la’o nain rua tolu iha estrada ibun para haree situasaun atu fó garantia seguransa ba povu.

Nia hatutan, ISIS ka terorismu ne’e tama mai Timor Leste ne’e tanba saida, tanba Timor Leste laiha buat ida ho sira, no Timor Leste mós nunka kontra sira.

“Ita la lawan ema ida, ita nunka estraga ema ida no ita la ko’alia kontra sira nia intrese ne’e, sira mai iha ne’e atu halo saida,” relata David Ximenes.

Tanba ne’e nia husu ba nai ulun sira atu aviza ba povu hodi tu’ur hakamatek, tanba sei laiha buat ida atu akontese iha Timor Leste. David Ximenes dehan, isu ida ne’e atu halo tauk povu hodi atividade ekonomia iha Timor Leste ne’e tu’un.

Iha fatin hanesan, Deputadu Cesar Valente husi bankada CNRT mós hatete katak, ema atu halo buat ida hanaran terorismu ne’e, iha rai ne’ebé bo’ot ho númeru povu ne’ebé elevadus tebes.

“Ha’u hatete katak, Timor ne’e atu sai albu ba Estadu islamiku sira ne’e se dok, tanba la’os fasil sira atu halo, kuandu ita nia infraestruturas no buat hot-hotu ita haree borus ba mai hela, sira atu mai subar iha ida ne’ebé,” katak Cezar Valente.

Nia haktuir, ba nasaun Timor Leste ho propaganda sira ne’e, so atu halo terror povu de’it atu trauma, maibé sidadaun hotu kuandu hamrik hodi sai hanesan autor atu defende soberania ida ne’e, se lahela kleur iha Timor Leste.

Cezar Valente afirma, propaganda ida ne’e atu des estabiliza Timor Leste nia estabilidade nasionál.

Nia esklarese, antisipasaun Estadu nian ba ida ne’e mak, persija hasa’e vizilansia iha fronteira, no Servisu Nasionál informasaun sira tenke servisu maka’as liu tan.

“Agora dada’uk ita nia forsa sira i polisia no servisu intelensia la’o hela atu buka ema sira ne’ebé mak diskonfia involve iha estadu islamiku ne’e,”afirma nia.cos

Jornal Nacional