"Telefone mean" ativadu entre Xina ho Taiwan

"Telefone mean" entre Repúblika Popular Xina no Taiwan, teritóriu sira ne'ebé hahú tinan 1949 mantén konflitu ida soberania nian, hahú funsiona iha loron-kuarta ne'e, dalan ida hodi hakarak hametin relasaun entre Pekin ho Taipe.

Instalasaun hosi liña diretu hosi diálogu ne'e akontese tanba enkontru istóriku ida entre Prezidente xinés, Xi Jinping, no nia homólogu taiwanés, Ma Ying-jeou, iha fulan-Novembru liubá, maski sira na'in rua rejeita lejitimidade hosi nasaun ida-idak.

Andrew Hsia, xefe hosi Gabinete Taiwan nian ba Asuntu sira hosi Kontinente Xinés, ko'alia ohin ho Zhang Zhijun, responsável ba Asuntu sira hosi Taiwan iha Konsellu Estadu no iha Komité Sentrál hosi Partidu Komunista Xina nian (PCC).

"Hsia hatete liuhosi telefone katak ligasaun diretu hanesan rezultadu importante hosi enkontru entre líder sira hosi nasaun rua ne'e. Nia hein katak nasaun rua ne'e bele komunika beibeik iha asuntu urjente sira", hakerek iha komunikadu ne'ebé fó sai hosi gabinete Hsia nian.

IIha nota hanesan aponta katak mekanizmu konstitui "hakat importante seluk" iha interkámbiu sira entre Xina ho Taiwan.

Ma Xiaoguang, porta-vós hosi Gabinete ba Asuntu sira Taiwan nian iha Xina konfirma ona realizasaun hosi telefone ne'e, haktuir hosi ajénsia ofisiál Xinhua.

"Ami hein katak autoridade sira esforsa iha manutensaun no promosaun hosi dezenvolvimentu pasífiku hosi relasaun sira entre nasaun rua ne'e", afirma ona hosi Ma ne'ebé haktuir hosi ajénsia.

Relasaun sira entre Xina no Taiwan hetan fali ajitasaun bainhira Kuomintang, partidu pró-Pekin ne'ebé lidera hosi Ma, to'o iha poder no ohin loron konsidera hanesan ida ne'ebé di'ak liu ba nafatin.

Maibé, opiniaun públiku taiwanés nian deskonfia tanba sira haree katak akordu komersiál sira entre Taipe ho Pekin hanesan prejudisiál ba populasaun hosi illa ne'e.

Iha sondajen sira ba eleisaun lejislativu sira, ne'ebé sei hala'o iha fulan oinmai, Partidu Demokrátiku Progresista, ne'ebé séptiku liu kona-bá Pekin, mosu hanesan favoritu hodi mana'an.

Hafoin funu sivil xineza nian hotu, ho vitória hosi PCC, antigu governu nasionalista (Kuomintang) halai ba illa Taiwan hodi kontinua identifika hanesan governante hosi Xina tomak.

Pekin konsidera Taiwan hanesan provínsia xineza no defende "reunifikasaun pasífiku", haktuir hosi dalan hanesan ne'ebé adopta ba Hong Kong ho Makau ("nasaun ida, sistema rua"). Maibé, ameasa "uza forsa" bainhira illa ne'e deklara independénsia.

"Telefone mean" bainhira sai hanesan dalan komunikasaun diretu entre nasaun sira iha konflitu akontese bainhira instala tiha ona iha loron 20 fulan-Juñu 1963 iha White House no iha Kremlin, hodi evita funu nukleár ida entre poténsia mundiál rua ne'e.

SAPO TL ho Lusa