JENERAL LERE: REFORMA OU EXTENDE DEPENDE BA DESIZAUN

Xefi Estadu Maior das Falintil Forsa Defeza Timor Leste (F-FDTL), Maijor Jeneral Lere Anan Timor informa katak, desizaun kona-ba nia atu reforma ou extende nia mandatu ne’e depende ba Estadu, tanba buat hotu tenke la’o tuir lei.

Lere dehan, bainhira Estadu foti desizaun hodi halo reforma ba nia, nia sei hakarak iha uma de’it hodi halo to’os.

“Ha’u atu hateten katak, aseita ka la aseita, depende ba desizaun husi Governu nian, tanba ha’u servisu ba Governu. Agora ne’e la’os ida-idak nia hakarak no ida-idak nia vontade, ita iha ita nia konstituisaun, ita iha ita nia Governu no ita nia Parlamentu, ita iha ita nia Prezidenti, sira mak desidi, la’os ita mak desidi ita nia-an rasik,” dehan Lere Anan Timor ba Jornalista sira iha Palácio Prezidensiál Aitarak Laran Dili, Sesta (12/02), hafoin hasoru malu ho Xefi Estadu Taur Matan Ruak.

Lere Anan Timor dehan, iha sorumutu ho Prezidenti Repúlika ne’e, ko’alia kona-ba ninia mandatu ne’ebé mak remata ona.

“Buat hot-hotu ne’e, desizaun husi Governu no órgaun kompetente ne’ebé ke desidi buat sira ne’e, tanba ita sempre iha interdependénsia do órgauns, ida-idak ho nia kompeténsia,” katak Lere.

Tanba ne’e, Lere Anan Timor husu ba públiku atu kalma hodi hein rezultadu ne’ebé mak Estadu sei fó sai kona-ba nia mandatu iha tempu badak.

“Ha’u agora 64 anos, tama ona ba tempu reforma ninian, maibé tenke tuir prosedimentus, tuir regras, legalidades para atu dehan katak, ita mós nasaun ida, ita foin ukun an, maibé ita iha regra no prosediamentus atu la’o tuir,” relata Lere Anan Timor.

Lere dehan, uluk iha tempu funu nia laran ema ida la husu nia katak, hakarak halo funu ka la’e, tanba iha momentu ne’eba seida’uk iha lei ida atu regula sira, maibé hanesan Timor-oan iha dever no obrigasaun atu halo funu.

Maibé agora Timor Leste (TL) ukun-an tiha ona, lei mós iha ona, entaun hot-hotu tenke kumpri lei.

“La’os husu ha’u nia hakarak, husu mak lei ninia hakarak, se lei fó dalan rezigna, se la fó dalan pasiensia, ita servi, tanba ita iha mundu ne’e, iha misaun rua, servi Estadu no servi familia,” afirma nia.

Lere Anan Timor informa katak, sorumutu entre nia ho Prezidenti Repúblika Taur Matan Ruak ne’e mós, ko’alia kona-ba servisu iha lala’ok servisu iha F-FDTL nia laran.

“Ami hasoru malu ho Prezidenti Repúblika ko’alia kona-ba situasaun, ko’alia kona-ba srvisu, no ko’alia kona-ba asuntus balun ne’ebé ke interese ba ita nia Estadu no ita nia nasaun,” esklarese Lere Anan Timor.cos

Jornal Nacional