ESPEKULASAUN POLITIKA TL, FO INFLUENSIA NEGATIVU BA INVESTIMENTU

Espekulasaun politika ne’ebe ikus-ikus ne’e akontese iha vida politika Timor Leste nian fo implikasaun negativu maka’as ba vondate investimentu.

Eis Sekretariu Estadu Komersio nudar mos emprezariu nasional, Ricardo Cardoso Nheu, fo sasin katak, situasaun ou dinamika politika ne’ebe ohin loron lao iha rai laran, maske la hamosu krizi ruma, maibe sikologikamente fo imazen ne’ebe ladiak ba vontade investimentu iha rai laran.

“Ita nia vida politika ohin loron ne’e dominante liu ho espekulasaun ne’ebe halo ema mos preokupa no taridu, tanba ne’e, investor internasional sira, inklui Timor oan balun ne’ebe iha osan oituan atu halo invesitmentu mos senti laran rua-rua tanba espekulasaun politika hirak ne’e,” afirma Ricardo Cardoso Nheu, hodi responde jornalista sira iha Centro Pesquisa para Mudansa, Dili, Segunda (14/3/2016).

Vise Sekretariu Jeral partidu FRENTI-MUDANÇA ne’e fo sasin katak, pesquisa ne’ebe sira nia parte halo iha merkadu nasional, liu-liu iha Dili laran, hatudu katak, empreza internasional sira, preokupa oituan ho Timor Leste nia dinamika politika ne’ebe ladun fo vantazen diak ba lalaok invesitmentu.

Ho tensaun politika Timor nian, liu-liu kazu ixonerasaun ba Xefi Estado Maior das F-FDTL no falta linha koordenasaun no la iha komunikasaun diak enstre orgaun Soberanu Estadu nian, Ricardo Nheu hateten, la kontribui ba progresu dezenvolvimentu ekonomia sustentavel iha rai laran. Tanba ne’e, ekonomia TL nian ohin loton monu husi 40%-60%.

“Situasaun ekonomia ne’ebe monu ba bei-beik husi loron ba loron ho espekulasaun politika sira ne’e la diak ba povu nia vida moris, sa tan forsa kompra menus no produsaun rai laran la iha. Nune’e bei-beik, ita sei la dezenvolve an no sei la sai husi nasaun ne’ebe kategoria ki’ak no mukit,” hateten Ricardo Nheu.

Ezersisiu politika ne’ebe lider nasional sira halo ohin loron hodi hare malu matan la mos, la iha harmonizasaun politika no odio vingansa ba malu, Ricardo Nheu konfirma katak, la kontribui estabilidade ekonomia, tanba ne’e, presiza hadia no rona malu.

Nudar emprezariu nasional, Ricardo Nheu halo kontaktu ho investor internasional balun ona ne’ebe iha vontade boot hakarak halo investimentu iha rai laran, liu-liu iha seitor turismu nian, maibe tanba tensaun politika ohin loron, halo investores internasional sira laran rua-rua.

“Espekulasaun politika ne’ebe hafutar palku politika Timor nian hatudu momos katak ita ba ukun la seriu atu muda povu nia moris, maibe ita hakarak liu maka ukun para benefisia ba ita nia an, ita nia familia, grupu no ita nia partidu,” hateten Ricardo Nheu.

Nudar Vise Sekretariu Jeral partidu FRENTI-MUDANÇA, Ricardo Nheu husu ba Timor oan hotu, liu-liu lider politiku sira atu halo konsolidasaun ba hanoin, katak interese povu nian ba povu nia moris diak ne’e tenke tau as liu interese hotu-hotu.

Nia hatutan, se politiku sira maka tau arogansia politika no interese grupu as liu hotu-hotu, keta mehi atu povu ne’e moris diak. Se nune’e, nasaun ho povu ne’e sei sofre husi konsekuensia lideransa sira nia arogansia no ambisaun.nia

Jornal Nacional