Lakohi CNRT Naran Foer, Arao Husu Vicente Ba Hatan Iha Tribunal

DILI – Partidu Nasional Reconstrucao Timorense (CNRT) lakohi atu nia naran foer iha publiku nia matan, tanba nee husu ba Prezidente Parlamentu Nasional (PN) Vicente Guterres neebe hanesan mos lider CNRT ida atu ba hatan iha Tribunal, relasiona diskunfia komete kazu KKN.

Deklarasaun nee fo sai husi membru deputadu husi bankada CNRT, Arao Noe de Jesus da Costa Amaral, ba jornalista sira iha uma fukun Parlamentu Nasional, Kinta (17/03/2016).

Asuntu ida nee ami mos lamenta teb-tebes tanba asuntu nee lori mos impaktu ba partidu tanba iha ema balu hanoin katak partidu mak lakohi prezidente Parlamentu Nasional (Vicente_red) atu ba hatan iha Tribunal nee lalos, tanba ami mos lakohi partidu nia naran at no hau konkorda diak liu ba responde iha Tribunal hodi hatene se mak sala no se mak los,” dehan Arao.

Nia hatutan hanesan membru deputadu ida lakohi atu husik bebeik problema nee iha fatin hodi halo publiku kontinua trata membru PN tomak inklui hafoer partidu CNRT nia naran, tanba deit ema individu ida nia hahalok.

Laos nee deit nia mos konkorda atu hasai imuniade Prezidente PN hodi bele halos problema nee iha Tribunal, maibe tuir nia hare kazu neebe mak Vicente Guteres hasoru nee laiha fundamental hodi bele hatama Vicente Guteres ba prizaun.

Iha fatin hanesan Prezidente Partidu Frenti Mudansa, Jose Luis Guteres, mos hatete katak nia rasik mos kolia ona ho Prezidente Parlamentu Nasional relasiona ho kazu neebe mak Vicente hasoru atu nune bele hatene se mak los no se mak sala. Informasaun kompletu iha STL jornal no STL Web, edisaun Sesta (18/3/2016). Thomas Sanches

Suara Timor Lorosae