Baku Loja Nain, MG Ba Hatan Iha TMD

Tanba hahalok ida ne’e hanesan krime ida, arguido MG tenke ba hatan iha Tribunal Munisipiu Dili (TMD), no tuir akuzasaun husi ministeriu publiku ne’ebe lee sai husi juis prezidente katak  iha Segunda-feira, 25 Julhu 2015, mais umenus oras tuku 4 lokraik, arguido ba hasoru vitima (HY) hodi husu atu deve sasan, maibe vitima lakohi.

Entretantu iha data hanesan oras tuku 8 kalan, arguido mai fali maibe ho kondisaun lanu, hodi husu nafatin ba vitima atu deve sasan no iha altura ne’eba vitima nafatin lakohi atu fo.

Entaun arguido foti besi ne’ebe arguido lori, hodi baku vitima nia sasan sira no tuku vitima nia ibun to’o ran.

Hafoin lee sai akuzasaun hirak ne’e, juis prezidente husu ba arguido atu hili koalia ou nonok, maibe iha altura ne’eba arguido hili nonok hodi prova, katak akuzasaun hirak ne’e loos hotu.

Hafoin ne’e juis prezidente mos husu ba vitima atu hili koalia ou nonok, maibe iha altura ne’eba vitima hili koalia hodi dehan ba tribunal, katak agora dadaun vitima no arguido diak malu ona.

“Nia husu diskulpa ona ba hau no nia atu fo osan ba hau atu troka sasan ne’e, maibe hau lakohi,” vitima HY deklara iha tribunal.

Entretantu ministeiru publiku husu ba tribunal atu fo pena natoon ba arguido, hanorin arguido atu labele halo tan aktu hanesan iha future.

Enkuantu defensor publiku ne’ebe sai defeza arguido nian, husu ba tribunal atu absolve tiha kazu ne’e, tanba arguido no vitima diak malu ona e arguido pela primeira vez involve iha kazu no nia rekonese duni hahalok ne’e no promote ba nia aan katak sei la halo tan aktu hanesan iha futuru.

Hafoin rona tiha deklarasaun hirak ne’e liu-liu husi vitima, juis prezidente fo pena suspensaun ba arguido.

The Dili Weekly