Merenda Eskolar La Organizadu, Estudantes Jajan Iha Liur

Estudantes gosta liu sosa hahan ( jajan) iha liur duke hein no han hahan husi merenda eskolar ne’ebe implementa ona iha eskolas ensino baziku durante ne’e, tanba ladun organizadu.

Jestor Programa rede edukasaun Timor Leste Coaliation for Education (TLCE), Matias dos Santos, hateten mekanismu ba implementasaun programa ne’e ladun diak, tanba estudantes tenke forma iha linha hodi simu hahan.

“Entaun sira kolen no deside sosa hahan ne’ebe inan sira fa’an besik eskola,” Jestor TLCE dos Santos hateten, iha Dili. 

Alende merenda eskolar no sira ne’ebe fa’an hahan iha liur komplex eskola nian, nia dehan, iha mos profesor balun fa’an es iha klase laran.

“Entaun iha grupo tolu mak prepara hahan iha eskola lor-loron ba labarik sira,” nia dehan.

“Merenda eskolar, inan sira ne’ebe fa’an has budu no aifuan sin sira no profesores fa’an es iha eskola laran.”  

Tuir nia, ida ne’e problema ne’ebe seriu e ministerio tenke toma atensaun urgent, tanba hahan sira ne’ebe fa’an besik iha eskola ne’e la seguru (saude) no bele lori moras ba labarik sira. 

Iha parte seluk estudantes Ensino Baziku Farol, Margarida Baptista, hateten programa ne’e diak maibe falta higiene. 

“Uluk hau han, maibe agora lae, hau sosa fali nasi bungkus iha liur mak han,” nia dehan. 

Entretantu Membru Komisaun F (saude, edukasaun, kultura, veteranus e igualidade), Deputada Ilda Maria da Conçeicão, husu jestor eskolas bandu tiha inan-aman sira ne’ebe fa’an iha koridor eskola nian, tanba merenda eskolar iha ona. 

“Bandu labele fa’an atu labarik sira han hahan ne’ebe eskola prepara,” nia hateten. 

Kona ba estudantes sira forma linha, nia dehan lolos Misterio Edukasaun tenke harii sala han nian ida kada eskola, atu estudantes tuur mak han.

Iha tinan 2006, governu hahu implementa programa merenda eskolar iha eskola balun hanesan pilotu, maibe agora extende ba munisipio hotu, ho objetivu atu hasa’e numeru alunus iha aula no redus numeru repetisaun klase.

Tanba, tuir nia antes ne’e (seidauk implementa merenda eskolar) numeru labarik abandon aula aas inklui repetisaun.

Nia dehan, razaun estudantes abandonu klase tanba sira hamlaha, no distansia entre uma no eskola ne’ebe do’ok entaun sira la konsege matabixu husi uma.

The Dili Weekly