PAPEL JUVENTUDE IMPORTANTE BA KONSTRUSAUN ESTADU

Sekretariu Estadu Juventude no Desportu (SEJD), Leovigildo da Costa Hornay, hatete, papel juventude importante tebes ba konstrusaun no  dezenvolvimentu Estadu ida ne’e.

“Ha’u tenta atu hatete hela buat lubuk oan ida maibe rezumu deit buat tolu ka hat, iha kontekstu konstrusaun nasaun ida ne’e nian, hakarak ka lakohi papel ema foin sa’e nian importante tebe-tebes, iha dezenvolvimentu integradu no sustentavel, iha dezenvolvimentu ida ne’e hatur prioridade maka’as atu enkoraja ema foin sa’e sira iha parte hotu hotu,”hatete Sekretariu Estadu Leovigildo liu husi nia diskursu  iha Kongresu Nasional Juventude FRETILIN, ne’ebe hala’o iha Centro Convenções de Dili (CCD), Domingo (12/6/16).

“Ita rekonhese katak husi kedas primeiru Governu konstitusional to’o mai VI Governu konstitusional, ita hasoru situasaun ne’ebe nakonu ho dinamika no dezafius oi-oin, rekonhese mos ida ne’e tanba ne’e iha mudansa oi-oin ne’ebe akontese ho nia konjuntura ne’ebe ita bele tetu no hatene hotu.  Tanba ne’e atan hau hetan fiar iha tinan ida ba kotuk, hau hanoin pontu de vista Governu nian, barak ka uitoan imi hotu haree no akompanha, ida ne’e hatudu mai ita atu serbisu nafatin iha prinsipiu ka valor no vizaun ida deit ba Timor-Leste nia dezenvolvimentu no Sustentabilidade, ”hatete Leovigildo.

Leovigildo hatutan,  iha Sekretaria Estadu Juventude no Desportu, tuir lei organika no VI Governu konstitusional, iha  nia politika atu hatur  politika rua importante; ida maka foin lalais aprova dokumentu ida ba ema foin sa’e Timor laran tomak, no ne’e politika nasional ba ema foin sae.

“Iha politika ne’e rekonhese katak investimentu ne’ebe presiza hatur mak investimentu baze ba ema, infrastrutura  tomak, sistema, politika ne’e rasik atu bele transforma  materializa vizaun ka pensamentu tomak iha dokumentu ne’e. no politika ida fali maka agora halo hela prosesu ida namanas maka elabora ka dezenvolve dadauk politika nasional ida ba desportu ninian tanba tuir buat ne’ebe hatene no halo ona, analiza interna ida katak, dokumentu rua prinsipal ne’e la iha labele dezenvolve foin sira no dezenvolve desportu iha Timor-Leste,”dehan Leovigildo.

“Ha’u fiar no serteza metin  ho hanoin nafatin katak ho partisipasaun no apoiu tomak husi belun no kolega sira, liu hau nia aman no lider nasaun tomak, hau fiar katak ita bele halo buat ruma ba ita nia joven sira no area tematika desportu iha Timor-Leste. Hau mos dehan tan, iha inkontru lubuk ida ne’ebe ami halo, involve kamada hotu-hotu, hodi buka pensamentu no vizaun ida deit hodi hatur plataforma rua ne’e iha interese nasional no sustentabilidade politika estrategia interese nasional ida,”dehan nia.

Eis Prezidente CNJTL ne’e hatutan, sira mos aposta maka’as los atu introduz planu estratejiku dezenvolvimentu nasional ne’ebe defini tiha ona, fiar katak ho nia prezensa  tinan rua ne’e deit, bele ajuda hatur hela dokumentu ka livru sira ne’e, depois membru Governu foun ida mai troka nia, sira prepradu no hein ezekuta deit dokumentu sira ne’e. Tanba ne’e  selebra dala ida tan, iha forum a’as ida ne’e, atu hatudu komitmentu bo’ot Governu no Estadu nian, atu fo em faze ba iha partisipasaun ema foin sa’e sira ba iha konstrusaun Estadu no nasaun ida ne’e.

 “Atu konklui, wainhira sai lider joven ida diak, lider ida ne’ebe  laos hanoin buat ne’ebe iha tempu badak maibe nia tenki projeta buat ne’ebe naruk, iha serteza, hafanun nia, haforsa nia ho problema oi-oin atu nune’e nia bele sai joventude ida madoru no prontu atu bele kompete iha kualker momentu no situasaun. Ba dala rua hau hanoin ida ne’e mos importante tebe tebes,  artigu 19 konstituisaun da Republika, mensiona no esklarese mo mos  kona ba papel ema foin sae sira nian atu hametin unidade nasional, estabilidade nasional no koesaun sosial ba ita nia soberania no independensia nasional tanba ne’e partidu politiku, liu-liu lider no organizasaun joventude partidu tenki aposta lolos artigu 19 ne’e nudar plataforma hanoin atu dezenvolve no kontribui ba nasaun doben ida ne’e,”Nia hatete.Des

Jornal Nacional