Sekretáriu-jeral ONU nian hein katak UE mantén hanesan "parseiru sólidu"

Sekretáriu-jeral ONU nian, Ban Ki-moon, hatudu esperansa iha loron-sesta ne'e katak Uniaun Europeia mantén nafatin hanesan "parseiru sólidu" ONU nian, maski iha desizaun hosi Reinu Unidu hodi sai hosi bloku europeu.

"Sekretáriu-jerál hein katak Uniaun Europeia kontinua hanesan parseiru sólidu ONU nian iha kestaun humanitáriu sira no dezenvolvimentu nian, nune'e mós ba dame no seguransa nian, inklui migrasaun", afirma ona hosi Ban Ki-moon iha komunikadu ida ne'ebé haktuir hosi ajénsia France Press.

Diplomata súl-koreanu hatudu mós esperansa atu Reinu Unidu asumi nafatin lideransa iha área oioin inklui iha área dezenvolvimentu nian.

Kona-ba períudu tranzisaun ne'ebé agora sei hahú to'o saída formal Reinu Unidu nian hosi Uniaun Europeia, sekretáriu-jeral ONU nian afirma ona katak fiar iha "istória komprovadu hosi pragmatizmu Europa nian no iha nia sentidu hanesan ba responsabilidade iha interese hosi sidadaun europeu sira nian".

Eleitór britániku sira desidi ona atu Reinu Unidu sei sai hosi Uniaun Europeia (EU), hafoin "Brexit" konkista tiha ona 51,9% hosi votu sira iha referendu ne'ebé hala'o iha loron-kinta ne'e no nia taxa partisipasaun maka 72,2%.

Primeiru-ministru britániku, David Cameron, fó sai ona nia demisaun ho efeitu sira iha Outubru.

Bolsa europeia prinsipal sira loke ona iha loron-sesta ne'e ho negativu, ho bolsa hosi Londres tuun besik 08%, mantén to'o meiu-dia loron-sesta nian ho lakon entre 05% no 11%.

Iha reasaun dahuluk sira, prezidente sira hosi instituisaun europeia nian (Komisaun, Konsellu, Parlamentu Europeu no hosi prezidénsia rotativu sira hosi UE) defende ona "divórsiu" ida ne'ebé lalais, "maski prosesu ne'e hanesan todan".

SAPO TL ho Lusa