FAUSTINO REKUNESE KORUPSAUN SIKAT SUBAR

DILI - Prezidente Komisaun Funsaun Públika (KFP), Faustino Cardoso rekoñese, durante ne’e mosu duni kazu korupsaun, mal-admnistrasaun no kazu krime sira seluk iha Funsionáriu Públiku (KP) sira nia leet.

“Los duni kazu sira hanesan korupsaun,  mal-administrasaun ne’e iha duni agora hira-hira maka ha’u lahatene tanba KAK ho IJE sira maka halo investigasaun,”hatete Faustino ba jornalista sira hafoin partisipa expozisaun loron Nasionál ba Funsaun Públiku iha Edifisiu SEJD, Licidere, Segunda,  (11/07).

Faustino hatete, KFP sei la husik nia responsabilidade liu-liu  atu kria sistema ida oinsá  hasae imunidade ispiritual moral hodi bele hado’ok tiha funsionáriu sira hosi tentasaun no prátika korupsaun. 

Sistema ne’e sei kria maka, KFP rasik iha ona hanoin hanoin hodi lansa santo ida sai nu’udar mahein ba funsaun públika  nune’e bele asegura sekarik mosu buat ruma la loos iha funsionáriu nia leet maka santu ne’e maka sei fo hanoin.

Lansamentu ba santu ka traze funsaun públika ne’e hanesan programa ne’be  funsionáriu públiku sira sei uja iha loron balun ne’ebé maka dekretu lei governu nian defini ona.

“Programa santu ne’e oinsá  maka ita atu kria sistema ida hodi hasai imunidade spiritual moral atu nune’e bele hado’ok an hosi  tentasaun no prátika sira ne’ebé maka bele ba funsionáriu publika sira ho ne’e maka ami sei lansa  ninia santu ida,”Faustino hatete.

Sai FP Tenki servi ba Povu

Prezidente Komisaun Funsaun Públika (KFP), Faustino Cardoso hatete, sai Funsionáriu Públiku (FP) la’os halo jeitu hanesan liurai no halo povu sira sai atan maibe FP sira  tenki sai hanesan servidor atu servi povu.

“Liurai maka povu sira, tanba FP sira halo atendementu ba sira, tan ne’e hanesan servidor tenki hatene an no tenki hatene hatur an iha ne’ebe, tanba hanesan servidor tenki servi ho domin, di’ak no profesional hodi bele alkansa objetivu povu nian ba moris diak ne’ebe nain ba Estadu nian,’’dehan Faustino ba jornalista sira iha Edifisiu SEJD  Lecidere, Segunda, (11/7).

Faustino haktuir, povu maka hanesan nain ba estadu, nune’e sira tenki hetan atendementu di’ak ba kualker saida de’it, tanba KFP hamriik atu halo atendementu ba públiku no sai servidor ba povu sira hodi kontribui ba prosesu dezenvolvimentu. (res)

Timor Post