ESTADU KONDEKORA MEDALLA MERITU BA SAUDOZO AMU LEAO

DILI - Antes atu haloot mate isin Saudozu Amu Leão da Costa iha semitériu Ailoklaran, Prezidente Repúblika (PR), Taur Matan Ruak iha Katedrál Dili, Vila-Verde, Segunda, (11/07) kondekora medalla de Méritu ba saudozu nu’udar ondra ida ba amu nia kontribuisaun iha luta libertasaun nasionál no prosesu dezenvolvimentu edukasaun iha Timor Leste.

Xefe estadu hatete, tuir loloos kondekorasaun medalla de méritu ne’e entraga ona ba saudozu amu Leão da Costa liu hosi serimónia komemorasaun loron restaurasaun da independensia, dia 20 de Maiu foin lalais ne’e iha postu administrativu Gleno,  munisípiu Ermera, maibé Amu padre la partisipa iha serimonia ne’e tanba kondisaun saúde la permite.

“Amu Leão da Costa fó nia kontribuisaun tomak ba ita nia rai, ba ita nia nasaun no ita nia povu, iha 20 de Maiu foin dadauk kondekora nia ho órden de méritu,”xefe estadu, Taur Matan Ruak hato’o lia hirak ne’e liu hosi nia mensajen bainhira halo misa solene ba Amu Padre, Leão da Costa iha Katedrál Dili, Vila-Verde, Segunda, (11/07).

Xefe estadu hatete, núnka hanoin kondekorasaun ne’e bele entrega iha tempu ne’ebé amu Padre hakotu ona nia ís, maibé xefe estadu labele halo ida ne’e tanba kontra ho vontade xefe estadu nian.

“Ha’u nunka hanoin katak medalla ida ne’e ohin maka ha’u foin entrega bainhira nia hakotu nia ís, ha’u nia vontade no ha’u nia hakarak maka fó ba nia bainhira nia sei moris mas ha’u labele halo ida ne’e tanba kontra ha’u nia vontade,”dehan PR Taur.

Xefe estadu sente laran dodook tebes lakon bibi atan ne’ebé di’ak no aman ba dezenvolvimentu iha área edukasaun nian.

PR Taur lori nasaun no povu tomak nia naran fó kondekorasaun baa mu Padre hanesan jestu agradesementu no fó obrigadu ba kontribuisaun ne’ebé maka Amu Padre Leão halo durante sei moris.

Maske isin lolon mate maibé Amu nia memória sei la mate, nasaun tomak sei hanoin nia tanba buat ne’ebé Amu Padre hosik hela hanesan riku ne’ebé maka povu tomak halo tuir.

Medalla de méritu ne’e hosi Prezuidensia da Repúblika dekretu Prezidensiál númeru 5/2009, 18 de Marsu hodi rekoiñese no agradese ba sivíl no militár nasonál no Internasionál ne’ebé maka fó ona kontribuisaun signifikativu ba estabilidade nasionál.

Tanba ne’e medalla de méritu ne’e simboliza protidaun ba ema ne’ebé maka hala’o nia papél ativu iha prosesu dezemvolvimentu demokrasia iha Timor-Leste.

Dekretu Prezidensía da Repúblika ho númeru 19/2016, dia 11 de Maiu, Prezidente Repúblika fó kondekorasaun ba refedendísimu Padre Leão da Costa.

Tanba ne’e liu hosi misa solene ba amu padre Leão da Costa nian, xefe estadu entrega medalla ne’e ba xefe estadu.

Don Virgílio Agradese Amu Leão

Portantu iha seremonia misa solene ba Padre Leão da Costa nian iha Igreja Katedral Vila Verde Dili, amu bispu dioseze Dili, Don Virgílio do Carmo da Silva, agradese ba nai maromak tanba tau ona figura diak ida iha mundu ne’e hodi fo kontribuisun ba Igreja no dezenvolvimentu nasaun.

“Ita hasae agradese ba Maromak fó mai ita prezente boot ida husik vigura boot ida edukador no pastor ba nasaun. Momentu hanesan ita atu fó agradese ba ba buat diak hotu ne’ebé maka amu Leão da Costa halo ba rai doben povu no doben Timor Leste nu’udar edukador no pastor,”dehan Amu Bispu, Segunda, (11/07).

Amu Bispu mós fó agradese ba Senhora Fatima ho nia família ne’ebé ho laran luak desponibilidade tomak akompaña no fó asistensia baa mu tinan hirak ikus ne’e, liliu iha nia tempu moras ninian.

“Hodi Dioseze Dili nia naran hato’o agradese ba ita boot sira no amu Leão sei lataka matan ba buat di’ak hotu ne’ebé ita boot sira halo ba nia. Ha’u hakarak hato’o de’it ba ita boot sira momentu di’ak ida ita hotu mai iha ne’e, tanba amu Leão hadomi ita, domin ne’e nia manifesta hodi eduka no servi ba ita nia oan sira liu hosi daln oi-oin,”nia esplika.

Amu Leão nia domin sei sai boot liutan,  tanba sarani hotu hamutuk atu reza ba nia, nia isin sei sai boot liutan no nia isin sai di’ak liutan, nia di’ak ba iha ema nia moris reliziojus ho amu lulik.

Iha fatin hanesan, Presidente Komisaun Organizadora ba funeral Amu Leão da Costa nian, Pe. Juvito do Rego hato’o agradese ba Amu Bispu sira iha uma kreda liu-liu profesores Don Virgílio ninian ne’ebé ukun dioseze ida no membru diosezana hirak ne’ebé servisu hamutuk ho amu Leão hodi halo nia kna’ar nu’udar nai lulik.

“Ha’u hakarak lori komisaun ida ne’e agradese ba Madre Guilermina ho madre sira hotu no ba amu Cunha, amu Sequiras, amu Martins no legus sira seluk ne’ebé kontribui kolabora ho nia momentu ne’ebé hamutuk ho nia hari’i eskola,”hatete Pe, Juvito.

Agradese mós ba família amu Leão ninian, subrinho sira Lázaro ho nia feton sira, ne’ebé kuandu oras ona hakat mai hamutuk ho amu Leão iha Hospital. Ba profesores, profesora, alunus externato São José ne’ebé iha tempu naruk nia laran elabora ho amu Leão hodi halao kna’ar edukador ninian.

Alende ne’e agradese mós ba grupu Eskuteirus ne’ebé maka amu Leão hanesan mós fundador ida, ne’ebé presta sira nia atensaun no didikasaun iha momentu sira ne’ebé amu Leão mesak.

Timor Post