Lere Husu Jerasaun Foun Hametin Nasionalizmu

DÍLI, (ANTIL) – Major Jenerál FALINTIL-Forsa Defeza Timor-Leste (F-FDTL), Lere Anan Timur husu ba jerasaun foun atu hametin nasionalizmu.

“Hadomi imi nia rain nomós hadomi imi nia povu”, hatete Lere iha nia intervensaun kona-ba “Dá Luta nas Montanhas à Vitória” iha Konferénsia Daruak  Memória no Identidade Nasionál, Sentru Konvensaun Díli, Kuarta, (17/8).

Lere mós husu ba jerasaun foun atu estuda maka´as tan, nia hatete, ita ne´ebé moris sei debe hela sira ne´ebé mate (éroi sira) hodi luta ba libertasaun nasionál Timor-Leste.

Tan ne´e ita tenke hatutan sira nia ain ain fatin, halo tuir saida maka sira halo.

“Ita ukun aan la´os milagre maibé ita lori ita nia maluk barak sira nia isin no ran maka ita bele ukun aan. Sira la mate karik ita la ukun aan”, nia reforsa.

Iha biban ne´e, nia mós haktuir, durante luta iha ailaran sira iha prínsipu ida de´it katak mate ka moris ukun rasik aan.

Nune´e mós nia haklaken, luta TL ne´e konta mós kontribuisaun husi nasaun sira ne´ebé agora inklui iha Comunidade dos Países da Língua Portuguesa (CPLP) ne´ebé luta hodi hetan ukun aan inklui teória Mao Tse Tjun, China hodi konduta ita nia funu.

Nia hatutan, Timor-Leste nia luta durante tinan 24 nia laran ne´e funu ida ne´ebé úniku diferente tebes iha mundu rai klaran, tanba TL konta ho nia forsa rasik. (jornalista: Rafy Belo; editora: Rita Almeida)

Foto: Major Jenerál FALINTIL- Forsa Defeza Timor-Leste (F-FDTL), Lere Anan Timur. Foto Espesial