Japaun apoiu deslokalizasaun terminál pasajeiru iha porto Díli

Governu Japaun sei  finansia, liuhosi  apoiu ida besik dólar millaun  22, projetu deslokalizasaun terminál pasajeiru iha porto Díli, ne’ebé sei arranka iha 2017 no konkluí fulan 22 tuir mai.

Terminál atuál ne’ebé  uza ba ema halo viajen ho destinu ba Oecusse no Ataúro, iha parte  orientál porto Díli nian, kauza difikuldade balun iha jestaun operasaun seguransa ba pasajeiru sira, ne’ebé hakat ba mai ho sasan todan.

Iha  komunikadu,  embaixada Japaun iha Díli esplika kona-ba resposta  pozitivu ba pedidu apoiu kona-ba  transferénsia terminál sentru Porto nian, ba parte osidentál, liuhosi memorandu entendimentu projetu ne’ebé assina iha finál fulan kotuk.

Projetu ne’e inklui konstrusaun ba kais  molle rua ho naruk metru  100, plataforma ida no asessóriu sira seluk, hanesan  ahi, abastesimentu bee, fornesimentu enerjia, idrante, no ekipamentu ba seguransa.

Molle ne’e sei bele  akomoda ferrie rua iha tempu hanesan, inklui Nakroma, ne’ebé uza halo  ligasaun ba enklave Oekusse no ba illa Ataúro.

Akordu kooperasaun  asina liuhosi serimónia ne’ebé partisipa hosi ministru Obra Públika, Transporte no Komunikasaun, Gastão de Sousa no vise-ministru Negósius Estranjeiru, Roberto Soares, hosi parte Timor-Leste nian, no embaixadór Japaun iha Díli, Eiji Yamamoto, no reprezentante hosi ajénsia kooperasaun japoneza JICA, Hideaki Matsumoto, hosi parte  japonés nian.

Iha komunikadu, embaixada nipónika esplika katak  projetu ne’e ho objetivu "kontribui atu hadia  atividade ekonómiku iha Timor-Leste", asegura " funsionamentu efisiente no seguru iha transporte ba pasajeiru sira" iha Díli.

"Hau hein katak, ho konkluzaun ba projetu ne’e, ema sira bele utiliza terminál 'ferry' forma ida seguru no efisiente liu, ne’ebé sei kontribui ba dezenvolvimentu nasaun nian", haktuir embaixadór japonés ne’e.

SAPO TL ho Lusa